Hong Kong Open-ah Venus Williams a tlawm

WTA Hong Kong Open khelh mekah champion tura rinkai Venus Williams chu second round paltlang zo loin a tla. Nilaini zan khan Venus hi tleirawl Naomi Osaka lakah 7-5, 6-2 in a chak lo.

Japanese star Osaka hian tun hnaiah a khel ṭha tluang hle a, a zawna match riat hnehna a channa chiah niin quarterfinal a inhlangkai a ni. Semifinal lut tur chuan Anastasia Pavlyuchenkova a paltlang leh a ngai ang.

Kum 37 mi Venus chuan, "Set khatnaah 5-4 a nih laiin a chungnung zawk nih theihna hun ṭha ka nei a, tihsual ka neih hlauh avangin set a la, a pumpui thlir chuan a khel ṭha zawk a, hnehna chan kha a phu a ni," tiin a sawi.

Inkhel dangah seeded pa­sarihna Daria Gavrilova chuan last 16 paltlang turin American Shelby Rogers chu 6-1, 2-6, 6-2 in a hneh ve bawk. Rogers leh Gavrilova te hi US Open-ah khan an intawng tawh bawk a, Grand Slam inelna lianah hi chuan Rogers-i'n hnehna a chang - tun ṭumah erawh result a inthlak ta thung a ni.