Phur lutuk hun a la ni lo - Hamilton
Formula 1 driver championship-a hmahruai mektu Lewis Hamilton chuan champion tur anga inngaih ngawt theih a la nih loh thu a sawi a, United States Grand Prix-ah erawh hnehna chang ngei a beisei thu a sawi.
Mercedes driver Hamilton hian kuminah intlansiak vawi 16 hmachhawn tawhin vawi 10 ngawt pole position a chang thei a, vawi riat hnehna chang tawhin driver cheṭha ber a ni mek - intlansiak hmabak pali chiah an nei tawh.
World champion vawi thum ni tawh Hamilton chuan, "Ka vannei a nih chuan US-a kan intlansiak hunah world champion ka ni thei dawn, mahse kan elpui ten tha an thlah dawn lo a, chuvangin engmah hi thil chiang a la awm lo," tiin a sawi.
October 22-ah United States Grand Prix tlan a ni dawn a, he intlansiakah hian Hamilton hian hnehna a chang a, a elpui Sebastian Vettel chu palina aia hniam a nih chuan Hamilton hian nomawi a chawi thei tawh dawn a ni.