Villa himna Captain Fantastic Grealish Watford leh Bournemouth an liam ta

Pathianni zan Premier League inkhelah Aston Villa, Watford leh Bournemouth ten season thara English top flight football khelh chhunzawm tumin an hma hun chinfel an tum a, a tawpa vannei ta ber chu Aston Villa an ni. 

Premier League aṭangin Norwich City chu division hniam lama relegate chiang hmasa ber an ni a, Pathianni zanah team pathum zinga pahnihin Championship lamah Norwich hnung an zui dawn tih a chiang. 

Villa-in Premier League khelh chhunzawm turin West Ham hneh an mamawh a, Watford-in Arsenal an sawp a ngai a, Bournemouth tan point thum hmuh bakah Villa leh Watford tlawm a ngai thung. Aston Villa-in West Ham inhnehtawkpui mah se Arsenal sawp mamawhtu Watford chu London club-in 3-2 in an lo hneh zawk a, Bournemouth chak mah se Villa-in point an hlawhchhuah avangin result awmze nei lo a chang - point khatin Villa an him a, an himna goal khungtu chu Premier League kaipuitu captain Jack Grealish a ni. 

English top flight football-a season khat chauh hun hman pawh hi pound maktaduai 100 chuanga hausak belhna a nih avangin 'thih tha' nena beih chi a ni a, a tawpah Villa an ding chang ta. 

West Ham khelmualah Aston Villa-in goal hmu turin minute 84 an nghah thlen a ngai a, Premier League club tam tak te chil ti puttu Grealish chuan top flight football khelh chhunzawm zel an la tum tih pholangin goal a rawn khung. 

Villa-in goal an khung lai hian Watford chu Arsenal laka an hnufual mek avangin Villa dinhmun a him tiin a sawi theih a, point khat lek an hlawhchhuah pawhin Premier League an khelh chhunzawm dawn. 

Season tawp lama insiamṭha Hammers-in mahni muala point hlawhchhuah loh an duh bik lo. Minute khat pawh a liam hmain Andriy Yarmolenko chuan London club tan a khung ve leh a, 1-1 a ni. Hun tawp thlengin team pahnihin goal dang an khung tawh lo a, a tawpah point hlawhchhuak Villa an lam - kar hnih liam ta kha chuan Villa hian point sarih ngawtin 17-na dinhmun an hlat a, a tawp zanah an him ta thung! Football-ah thleng thei lo a awm lo tih chu Villa-in a takin min hmuhtir a, tun hnaia 'form' em em mai Michail Antonio-a'n first half-a a hun ṭha neih a khawhral te kha Villa lawmna thlentu vek an ni. 

Watford-in match hnih chauh khelh tur la nei chungin an coach Nigel Pearson an ban a, an inchhir tawh ang tih a chiang - match hnihah an tlawm ve ve a, Premier League an mangṭha ta. Emirates Stadium-a inkhelah Arsenal-in minute ngana leka Pierre-Emerick Aubameyang penalty hmangin hma an hruai a, Kieran Tierney chuan Gunners tana a goal hmasa ber hmangin a chhunzawm - Auba-a'n goal khat dang a khung leh a, minute 40-a tlin hmain 3-0 a ni tawh. 

Watford-in huaisen takin an bei let a, Troy Deeney penalty leh Arsenal striker hlui Danny Welbeck-a goal hmangin beiseina thar an nei. Mahse, hun tawp thlengin goal dang an nei thei lo a, 3-2 in an tlawm.Pearson-a'n Watford a enkawl tirh khan league mawngphah an luah a, match 15 an khelhah vawi khat chiah an chak - Pearson hian a league match hmasa paliah vawi thum hnehna a chang a, February thla tawp lamah khan tlawm la nei lo Liverpool chu 3-0 a hnehin relegation zone an chhuah san. 

Mahse, season tawp lamah Hornets-in an beisei result an nei hleithei lo a, match hnih lek khelh tur awm tawh chungin thutlukna huaisenthlak tak an siam. Manchester City lakah 4-0 in an tlawm zui a, Arsenal lakah an tlawm leh avangin season thara an hmun tur chu Championship a ni ta. 

Premier League club zinga sum hmang na pawl chu Everton an ni a, khawvela coach ṭha ber pawl Carlo Ancelotti an neih bawk avangin Bournemouth chak ringtu an tam lo ang. Mahse, tlak duh lo Cherries-in team huaisen zia chhuahin Everton hi 3-1 in an hneh a, mahse Aston Villa-in point an hlawhchhuah miau avangin Eddie Howe naute tan an chakin awmzia a nei ta chuang lo. 

Bournemouth tan hian Joshua King chuan minute 13-na lekah penalty hmangin hmahruaina goal a khung a, Everton tan rawlthar beiseiawm Moise Kean chuan minute 41-naah a sut. Cherries-in Goodison Park-ah tlawm an tum lo - first half hun pek belhah harh tharna chang Dominic Solanke chuan an goal hnihna a khung a, minute 80-naah Junior Stanislas chuan a chhunzawm ve bawk. 

A tawpah team huaisen Cherries an chak a, Premier League inhamtan zel nan erawh a tawk zo ta chuang lo. Goodison Park-ah mittui a luang a, top flight football-a tlangnel taka khel hman Bournemouth chu season thar Premier League-ah kan hmu dawn ta lo.