Aizawl FC aia huaisen Mizoram Police

Mizoram Police-in an coach Lalbiaksanga Colney hnuaiah chak loh an tawng lo. Ṭhuamluaia Mualah Police hian Aizawl FC lakah goal hnih chhuah zet mah se sut let leh vekin 2-2 in an inhnehtawk.

Nimina Mizoram Premier League inkhelah hian AFC tan William Lalnunfela leh Romanian midfielder Andrei Ionescu ten goal an khung a, Police-in Lalbiakhlua leh F. Zosangliana hmangin an sut. Police forward F. Lalrinpuia chu man of the match a thlan a ni.

AFC chu...
Aizawl FC-in Lunglei mipui hmaah I League champion an ni tih an pholang thei lo a, amaherawhchu minute 41-naa William-a goal vangin dinhmun ṭha zawkah an ding. AFC goal hi vanneih goal-ah a chhiar theih a ni a, Police keeper Lalṭanpuia chetsual vanga goal lut a ni.

Second half ṭantirhah H. Lalmuankima'n crossbar a tauh per a, goal hnihna erawh minute 55-naah a lut tho. Andrei Ionescu-a'n theihna nei sang tak a nei tih a pholang. Romanian midfielder hian minute 55-naah Police defender hmaa ball a chawk kual hnuah mawi zetin a pet goal.

Aizawl FC-in inhliam vangin keeper Avilash Paul an thlak a, minute 37-naah Lalawmpuia'n a rawn thlak a, tun season-ah AwP-a'n vanneihna a kel tel lo.

Police ve thung
Mizoram Police-in game ṭha tak a khel a, Aizawl FC defender Masih Saighani tihsual vanga F. Lalrinpuia cross chu Lalsangbera'n a khung thei lo a, hemi hma hian Valpuia pass bawk chu Sanga'n hnai set sawt aṭangin goal-ah a chantir thei tawh lo. Hetih lai hian goal a la lut lo.

Police-in phase 1-ah 8-1 zetin AFC hneh lo mah se an zam chuang lo a, 2-0 a chak loh hnuah huaisen takin an khel a. Minute 78-naah Biaktea'n tun MPL-a a goal hmasa ber a khung a, chance ṭha ṭum hlahtu Sanga'n minute 89-naah siphurh sutna goal a tauh lut.

Engtin zel?
Armed Veng pa BS-a Colney hnuaiah Police-in match thumah point sarih an hlawh chhuak a, harhtharna an chan hi a satliah lo a, hmabak erawh a ko.

Mizoram Police bakah Ramhlun North, Dinthar FC leh Chanmari West ten point riat vek an hmu a, tun dinhmunah chuan an pali inkhelh kualna hi en a ngai. Police hian team pali inkhelh kualnaa result nei ṭha ber an nih avangin panganaa an awm a, he team hi round 5 zawha table mawngphaha awm kha an ni.

Aizawl FC-in point 10 an hmu a, India ram champion hian Mizoram chhung inelnaah palina an hauh pha chauh. I League champion hian vawi riat khelh tawhah vawi hnih chiah an la chak.