Chanmari FC-in Pune City hmachhawn dawn
Mizoram Premier League champion lai Chanmari FC chuan Indian Super League club FC Pune City chu October 16, Thawhṭanni hian Balewadi Stadium, Pune-ah an hmachhawn dawn. MPL club hian vawiinah Aizawl an chhuahsan ang.
FC Pune City hian Chanmari FC nen hian season ṭan hma khan inremna an ziak a, tun an inkhel tur hi ISL club tan season thara a inpuahchahna tur a ni. MPL tan chuan player phochhuahna hun ṭha a ni dawn a, ISL club hian an duhzawng an hmu a nih chuan an club-ah an la lut thei ang.
MPL club hian an goalkeeper Lalmuanawma chu nupui a neih dawn avangin an hruai tel lo a, captain Rochhingpuia'n AFC C Licence coaching course a zawm dawn avangin a kal ve thei lo bawk. MPL champion hi coach H. Vanlalthlanga'n ho a, player 16 an hruai tel bawk.
Chanmari FC managing board secretary Andrew Lalremkima chuan "Hetiang hun duhawm kan club-in kan tawng hi ropui kan ti a, kan players tan pawh chona lian tak a ni dawn a ni. FC Pune City hi ISL club zingah pawh a ṭha ber pawl an ni a, friendly match ni mah se chak tumin theihtawp kan chhuah dawn a ni," tiin inkhel an lak thutak thu a sawi.
MPL champion lai hi October 17, Thawhlehni hian a rawn haw leh ang a, October 19 zanah Ramhlun North nen MPL match pawimawh takah an inhmachhawn leh ngal ang.