Dinthar FC-in coach thar an ngeih

Mizoram Premier League champion hmasa ber Dinthar FC-in coach Vanlalrova hnuaia an match hmasa berah Chanmari West FC 1-0 in an hneh. Goal awmchhun hi minute 87-naa Dinthar forward Jackson Victor-a khung a ni.

West Warrior hian I League club Aizawl FC an hneh hnuah chak hmel an hmu tawh lo a, coach thar hnuaia khel Mizoram Police an hneh tawh lo a, coach thar hnuaia khel bawk Dinthar FC lakah an tlawm nawn - HC Zarzoliana hote fixture a fuh lo.

Jackson leh Mala

Aizawl West Derby-ah team pahnih an fimkhur a, goal chance an inpe tam lo. Maimawms midfielder Lalbiakhlua'n freekick hmanga an chance neih a khung thei lo. Chanmari West-in first half-ah goal zawnah an pet lo a, Ramhlun South tlangval Lalremruata'n chance ṭha a hlah.

Dinthar coach Rova'n a sawi lawk angin player thar Lalthawmmawia chu inkhel bul ṭantir mah se a khelh ṭhat tawk loha vangin a aiah player thar tho Liron Thunglotha luhtir a ni a. Naga forward Lotha hi Kolkata club Mohammedan Sporting tan pawha khel thei a ni. West Warrior-in Aizawl FC aṭanga an lakchhuah Vanlalduatsanga an luhtir ve bawk.

Chanmari West wing back Calvin Zosiamliana cross ball chu Lallianzama'n a tauh lut thei lo a, Dinthar keeper Mal­sawmdawngliana chu chhandamtu a ni. Dinthar coach thar Rova'n huaisen takin Nigerian midfielder Clarence Carter bench-ah a dah a, hunah tawp lamah luhtirin an goal nawr a na sawt.

Minute 87-naah Lalramliana corner pet chu Dinthar forward Jackson-a'n a lak thlak hnuah kawh zetin a pet goal. Maimawms-in an goal neih chhun hi point thuma chantir turin Mala chhan an mamawh a, injury time-ah West Warrior winger Vanlalthlamuana ball pet ṭha tak chu MPL best keeper ni lai Mala'n a dang.

Rova thukhawchang

Dinthar FC coach Vanlalrova chuan, "Kan tum chu kan hmabak match apiang chak a ni a, tuna kan dinhmun hi la ṭha lo mah se champion kan beiseina hi a la bo lo a ni. Kan chakna hi ka naute thawhrah a ni a, theihtawp an chhuah a ni," tiin a sawi.

Referee-in hun tawp hamrik a ham rualin Dinthar captain Malsawma Chhangte-in tlan chungin lawm vangin boruak a hnek a, a ṭhingṭhi zui. Coach thusawi dikna khelmual chhungah a lang a, Dinthar inbeisei neiin an khel leh ta.

ZoFooty Statistics
Chanmari West 0 - 1 Dinthar FC
DFC : Jackson Victor 87'
MoM : Malsawmdawngzela, DFC
50% Ball Possession 50%
10(6) Shots 15(7)
2 Yellow Card 0
0 Red Card 0
Powered by Rainbow Multibrand Mobile Showroom