The Normal One vs The Special One
Vawiin tlai dar 5:00-ah Liverpool chuan Manchester United an mikhual dawn a, eng level-ah pawh English club hlawhtling pahnih intawng tur boruak hi a te thei lo.
Club pahnih inhmachhawn tur piah lamah manager ropui Jurgen Klopp leh Jose Mourinho-te intawnna tur a nih avangin ngaihven a hlawh lehzual a, football khawvelin Anfield lam a hawi dawn.
Hman leh tun
Hmanah chuan Liverpool-in English football an thunun ṭhin a, Manchester United an chhuk en. Mahse, Premier League awm hnuah Liverpool a hnung zawngin an kal a, English top division-a champion ngun ber an nihna chu Manchester United-in an chhuhsak.
Mahse, Sir Alex Ferguson ban hnuah United-in ngai an awh rih bik lo a, he boruak karah hian insiamṭhat tum Liverpool-in manager langsar Jurgen Klopp an lo lalut ve bawk. Zaninah an ropuina rama kir leh tuma bei mek club pahnih an inhmachhawn dawn a, a hmuhnawm dawn tih a chiang.
Mane tel lohna
Liverpool-in match pawimawh an neih dawnah tak an player pawimawh Sadio Mane an chan a, Senegal international hi ram tana a fehchhuahna lamah a inhliam avangin United a mikhual ve thei dawn lo. Chile-ah ram tan feh chhuakin chau mah se Philippe Coutinho leh Roberto Firmino chu Reds tan inlan tura beisei an ni.
United an dam kim bik lo. Midfielder Marouane Fellaini chuan Belgium tan a inlanna lamah a khupah hliam a tuar a, Reds-in Mane an ngaih tluk zeta Red Devils tana ngaihawm tur erawh a ni lo. Captain Michael Carrick chu chawn hliam vangin a dinhmun a la chiang lo a, khup hliam defender Phil Jones chu dam hman turin an beisei.
Match satliah?
Football khawvelin Liverpool leh United inkhel tur an dah sang a, Red Devils boss Jose Mourinho tan erawh match pakhat ve mai a ni. Portuguese manager chuan, "Club lian i enkawl a, player hrawl tak tak i neih a, manager langsar tak i nih bawk chuan eng game pawh hi a pawimawh vek. Cup final ang maia match ṭhenkhat en bik ka duh lo. Tuna kan inkhel tur pawh hi point thum hlawhna tur a ni a, point li a ni lo," tiin Anfield an len dawn avanga boruak danglam a awm loh thu a sawi.
Mourinho chuan sawi chhunzawmin, "Anfield-a kal hi nuam ka ti a, Liverpool hmachhawn hi nuam ka ti. Stadium ropui leh khingpui hautak hmachhawn hi nuam ka ti. Kan inbuatsaihna erawh a danglam phah lo a, ka tan chuan match pakhat ve mai a ni," a ti.
Klopp-a kum hnih
Liverpool boss Jurgen Klopp-a'n vawiin United a hmachhawn hian Reds a enkawl kum hnihna chiah a hmang dawn. German coach hian Liverpool-a pan hnua a press conference hmasa berah, "Ringhleltute chu beiseina thar kan siam sak ang," tiin a sawi a, tun thlengin chu beiseina chuan nomawi hlawhchhuah erawh a la nei lo.
Klopp-a hnuaiah Liverpool-in league match 75 an khel tawh a, vawi 38 hnehna chanpuiin vawi 22 an khingpui an inhnehtawkpui - vawi 15 ngawt an tlawm thung. Klopp-a win percentage hi 50.67% a ni a, league match hmasa 75 aṭanga tehin Rafel Benitez (54.67) leh Brendan Rodgers (54.67) a phak lo. Klopp-a tan zanin hi Liverpool fan-te tana beiseina thar siamsak hun a ni a, tun hi ringhleltuten Klopp-a chunga rinna an nghah ngam hun tur chu a ni.