Test championship leh ODI league awm dawn

International Cricket Council (ICC) chuan test championship leh ODI league awm tura ruahmanna awm chu a pawm. Test championship hi kum hnih chhung khelh tur a ni ang a, ICC hnuaia test khel pha tura pawm chin ram 12 aṭangin ram pakuain an khel ang. Zimbabwe, Afghanistan leh Ireland ten Test championship hi an khel ve thei dawn lo tihna a ni.

Test championship hi World Cup 2019 zawhah neih ṭan tura tih a ni a, tun hnaia test ngaihhlutna tlahniam mek chawinun thar leh nana ruahman a ni. Test top nine team te chuan series paruk kum hnih chhung hian an khel ang a, khualmualah series pathum khelin mahni mualah series pathum bawk an khel ang.

Series tinah hian test match hnih tal khelh tur a ni a, a tam berah test match nga khelh tur a ni thung ang. Test championship final hi kum 2021 kum laihawl velah khelh tura ruahmanna siam a ni. Team 13 inelna tur ODI league hi kum 2021 aṭanga khelh ṭan tura ruahmanna siam a ni a, hei hi World Cup qualification atan hman a ni nghal thung dawn.