Atletico vs Barca Zaninah tu nge dingchang zawk dawn?

Barcelona-in tun season La Liga match-ah tlawm hmel an la hmu miah lo a, point ngain table chung berah an sang fal mek. Barcelona chelh thei tur hi an awm a nih chuan Atletico Madrid an ni ang - zanin 12:15-ah ram pahnih hi an inhmachhawn dawn.

Atletico hi Valencia nen Barcelona ang thoa tun season La Liga-a tlawm hmel la hmu lo an ni a, Barca an thlauhna erawh match sarih an khelh tawha match thumah an khingpui an inhnehtawkpui. Zaninah Barca an hneh a nih chuan point thum an hlawhchhuah bakah an elpui point an chhuhsak dawn tihna a ni - chak an tum ang.

Mahse...

Atletico ṭantu te tana thu hriat nuam lo tur chu an coach Diego Simeone-a'n Barca a ngam lo lutuk hi a ni. Argentine manager hian Barca a hmachhawn tawh match 21-ah vawi hnih chiah hnehna a la chang a, a hnehna chan ve chhunna lah Champions League a ni. Match 12-ah an tlawm a, heng zinga pariat hi La Liga-ah a ni - Simeone-a'n Barca laka a record siam ṭhat a duh dawn.

Theihnghilh thiang lo erawh Barca hi coach thar Ernesto Valverde hnuaia khel an ni dawn. Valencia leh Athletic Bilbao boss hlui hian La Liga-ah Simeone hi vawi kua a hmachhawn tawh a, Argentine manager lakah hnehna hlado a la chham ngai lo - Simeone-a'n he coach hi a hrechiang tihna a ni a, Barca coach a nih hnua ngam loh a tan a tlawm thlak ang.

Messi vs Griezmann

Barcelona sawi chuan Lionel Messi hming lam rik a ngai ṭhin. Argentina captain hian Atletico a hmachhawnin a ngam ṭhin hle - vawi 34 a hmachhawnah goal 27 a khung a, assist vawi li a nei. La Liga bikah Atletico lakah hian goal 22 a khung tawh a, zaninah goal hnih a khung a nih chuan La Liga-a goal a khung tam berna team Sevilla ni ṭhin chu Atletico a ni tawh ang - Messi tan goal khung a harsat lohzia chu hriat sa a ni.

Atletico Madrid tan Antoine Griezmann chu tlarhmaah an chhuanvawr a ni leh ang. French forward hian Real Sociedad tan a khelh laiin Barca hi vawi 10 a hmachhawn a, goal thum khungin assist pahnih a nei. Madrid khawpui a pan hnuah Atleti tan Barca hi vawi 12 a hmachhawn a, vawi thum goal khungin assist vawi khat a nei. Madrid khaw club hi Griezmann record vanga buai lutuk tur erawh an ni lo - Fernando Torres an nei, Liverpool forward hlui hian Barca lakah goal riat a khung tawh a, Catalan club a ngam hle.