Sanchez leh Ozil an chhuak mai thei - Wenger

Arsenal manager Arsene Wenger chuan a player duhlai Mesut Ozil leh Alexis Sanchez ten contract thar an ziah theih nan inbiakna chu tluang taka kalpui mek a nih thu a sawi, chutihrualin season tawp ruala an contract tawp tur pahnih hi Gunners chhuahsan thei dinhmunah an ding mek thung.

Gunners manager Wenger chuan, "Ka hmuh thiam dan chuan player pahnihte hi kan bulah an hlim a, inbiakna pawh tluang taka neih a ni. Season hmasa khan inremna chu kan siam fel thei lo ngei a, mahse hei vang hian an chhuak dawn tihna a ni kher lo. Chutihrualin tun dinhmunah chuan thu lawmawm puan tur a la awm hnai lo," tiin a sawi.

Season hmasa khan Wenger hian nipui chawlh laiin Sanchez leh Ozil te contract an tihfel tur thu a sawi a, a beisei angin thil a kal ngawt lem lo. Arsenal player pawimawh pahnih hian contract thar an ziah duh rih loh avangin nipui transfer lehpekah chuan man nei loin an chuak thei dawn - a thlawna chhuahtir ngawt ai chuan January thla hian an chuak lo ang tih a sawi theih loh.

World Cup qualifier khelh zawh hnuah tunkar tawp hian Premier League khelh chhunzawm a ni leh dawn a, September thla chhunga tlawm nei lo Arsenal hian Watford an lenchilh ang - Ozil leh Sanchez te hi inlan thei tura ngaih an ni.

Gunners hian hliam vangin Shkodran Mustafi an chhawr thei dawn lo a, defender dang Laurent Koscielny dinhmun a chiang lo bawk. Match hnuhnung lama hliam vanga an chhawr theih loh Danny Welbeck leh Ozil te erawh an dam tawh thung.