India an thamral; beisei tur an nei tawh lo
FIFA U17 World Cup-a India beiseina chu a thamral ta - Ningani zan khan last 16 lut tura beiseina tlemte an neih chu an chhi eng zo lo a, Ghana hmaah 4-0 in an mualpho. Group A inkhel dangah Colombia chuan 3-1 in USA an sawp bawk.
Mizo rawlthar Lalengmawia chu minute 78-naah tlan luhtir a ni a, Vaivakawn midfielder tan inkhel thlak danglam turin hun a awm lo. Mizo zinga World Cup khel hmasa ber Engmawia hi USA an hmachhawn ṭumin hun pek belhah tlan luhtir a ni bawk a, Colombia erawh a hmachhawn lo.
Team huaisen
India-in last 16 luh beiseina chhi nung turin hnehna chan ngei an ngai tih a hria a, team
ṭha Ghana hmaah Luis Norton de Matos-a'n attacking game khelh tumin a naute a remkhawm. Benfica B team coach hlui hian 4-3-3 formation a hmang a, Aniket Jadav, Nongdamba Naorem leh Rahul Kannoly te tlarhmaah an inrem - India in huaisen takin point thum hlawhchhuah an tum.
Ghana lamin fimkhur takin 4-2-3-1 formation an hmang thung a, mual sir lamah winger tlan chak pahnih Sadiq Ibrahim leh Edmund Mensah theihna chhawr ṭangkai an tum. Minute rukna lekah Ghana hian hun an nei nghal a, goal an khung - mah se linesman-in offside a phar a, India an vannei.
A goal
India-in goal khung ngei tumin nawr ṭhin mah se Ghana tlarhnung an su hawng zo lo a, counter attack apiang chu Indian fan-te tan thin phu ti rang tu a ni. Ghana tan winger Ibrahim-a'n hun ṭha vawi hnih ngawt a hlah hnuah African team hian an pet goal ta nge nge a, mual sir lam a-
ṭanga Sadiq-a ball pet chu Dheeraj Singh chuan lo nam per mah se vengtu nei lo Ayiah ke zawnah tak a tla a, goal-ah a chantir.
Goal an chhuah hnuah player tlan chak zawk, tharum ngah leh thiam zawk Ghana hmaa tho turin India tan hun a awm tawh lo. Ayiah-a'n a goal hnihna a khung hnuah minute 86 leh 87-naah a zawn zatin Richard Danso leh Emmanuel Toku ten goal an khung chhunzawm. India-in goal zawnah vawi hnih chiah shot an nei ve a, Rahul leh Lalengmawia te shot neih chu goal-ah a chang zo lo.
Colombia an chak
Group A inkhel dangah beisei loh result a thleng a, Colombia chuan 3-1 in USA an sawp. USA hian an match hmasa pahnihah India leh team ṭha Ghana an hneh thei a, mah se match tawp berah Colombia an ngam loh avang hian pathumna ni chungin group stage an khar daih - Ghana, Colombia leh US te hian point ruk ṭheuh an hmu a, an inthlauhna chu goal difference chiah niin last 16 an lut vek.
Ningani zan inkhelah Colombia hian minute thumna lekah Juan Vidal hmangin goal hmahruai an khung a, USA tan George Acosta chuan minute 24-naah a sut. Second half ṭan a nih hnuah India laka danglamna thlentu Juan Penaloza bawkin US lakah pawh danglamna a thlen a, freekick hmanga hmahruaina goal khungin goal thumna tura Deiber Caicedo goal khung tur a siamsak bawk. Hun a tawp a, Colombia-in hnehna an chang chiang hle.
India an vanduai?
World Cup-ah team 24 an tel a, group parukah team pali zel awma ṭhen an ni. Group tina pahnihna leh pathumna ti ṭha zual pali te chu last 16 lut tur an ni a, India awmna hi uluk taka thlir chuan an vanduai tih loh rual a ni lo. Age level-a sulhnu nei ṭha tak tak Ghana, Colombia leh USA te nen group khatah dah khawm an ni a, ram dang pawhin anni ho nena group khata awm ho hi an chak lo tawp ang.
Hetichung hian India hian US lakah inkhel hmuhnawm an lantir thei a, bar hial an pet per - minute 30-naa ṭul lo taka penalty an chawi kha inkhel thlak danglamtu a ni. Colombia lakah lah Indian an vanduai. Si phurh sutna goal an khung hnu lawkah fimkhur tawk loh vangin goal an chhuah a, bar an pet per bakah chance hlauhawm tak tak an nei bawk. Ghana lakah 'risk' lak an ngai tawh a, 4-0 a an chak lo hi a awm lo hran lo - Honduras, Niger, North Korea leh New Caledonia te ho awmna group-ah awm se chuan Indian football thawnthu ziah danglamin a awm ngei ang.
Inkhel dang
Ningani zan inkhel dangah Paraguay chuan 3-1 in Turkey an sawp a, Group B-a match thum an khelhah hnehna chang vekin last 16 an lut chiang hle. Paraguay tan hian Giovanni Bogado, Fernando Cardozo leh Antonio Galeano ten goal khat
ṭheuh an khung a, hun pek belha Kerem Kesgin goal khungin awmzia a nei lo.
Mali-in an match hmasa berah Paraguay ngam lo mah se a zawnin Turkey leh New Zealand an hneh a, last 16 an lut. Ningani zana New Zealand an hmachhawnna inkhelah Mali tan Salam Jiddou, Djemoussa Traore leh Lassana N'Diaye ten goal khat ṭheuh an khung a, Kiwis goal neihchhun hi Charles Spragg khung a ni thung.
Inkhel Results
October 12, Ningani zan
Turkey 1 - 3 Paraguay
Mali 3 - 1 New Zealand
United States 1 - 3 Colombia
Ghana 4 - 0 India
Zanin Inkhel Tur
Japan 5:00 PM New Caledonia
France 5:00 PM Honduras
Mexico 8:00 PM Chile
England 8:00 PM Iraq
Team Dinhmun
Group A
Pos Team Pld W D L GF GA GD Pts
1 Ghana 3 2 0 1 5 1 4 6
2 Colombia 3 2 0 1 5 3 2 6
3 United States 3 2 0 1 5 3 2 6
4 India 3 0 0 3 1 9 -8 0
Group B
Pos Team Pld W D L GF GA GD Pts
1 Paraguay 3 3 0 0 10 5 5 9
2 Mali 3 2 0 1 8 4 4 6
3 New Zealand 3 0 1 2 4 8 -4 1
4 Turkey 3 0 1 2 2 7 -5 1