World Cup zawha chawl tur Mascherano

Argentina midfielder Javier Mascherano chuan 2018 World Cup khelh zawh hunah ram tana inkhelh a chawlhsan zui tawh tur thu a sawi chhuak.

Barcelona player hi nakkum June thlaah chuan kum 34 mi a ni tawh ang, tun dinhmunah ram tan match 139 khel tawhin, Inter Milan legend Javier Zanetti aiin match li chiahin a khel tlem zawk - World Cup hnuhnung zawka final an thlen theih nan khan player pawimawh a ni.

Premier League club West Ham tan pawha khel tawh Mascherano hi midfielder a ni a, a ṭul hunah chuan defender atan pawh hman theih a ni. La Liga club Barcelona tan chuan tlarhnung lamah a hun tam zawk a hmang. Kum 2004, 2007, 2015 leh 2016 te khan an ram hi Copa America-ah pahnihna a nih pui bawk.

Mascherano chuan, "Ram tana ka football hun hnuhnung chu Russia-ah ka hmang ang, a aia rei khelh chhunzawm chu ka tum tawh lo. Mahse, Jorge Sampaoli-a'n World Cup khel turin min thlang dawn em tih ka la hre bik lo," tiin a sawi. Nilaini zing khan Argentina hian Ecuador chu 3-1 a hnehin South America ram 10 zingah pathumna an ni a, playoff khelh ngai loin an tling.