League hmahruaitu 7 star City

Manchester City chuan Inrinni zan khan Stoke City lamah goal hnih chhuah mah se goal sarih an khung a, Etihad Stadium-ah Pep Guardiola hote an par.

City tan Gabriel Jesus-a'n goal hnih a khung bakah Raheem Sterling, David Silva, Fernandinho, Leroy Sane leh Bernardo Silva ten an khung. Stoke tana Mame Biram Diouf goal khung leh Kyle Walker-a'n a lama a tihluh chu scoreline timawitu chauh a ni.

City an mawi

Guardiola season hmasa berah Manchester City-in bul an ṭan ṭha a, Spanish manager pawhin a beisei aia hmain a nauten a duh dan an man thu a sawi.

Amaherawhchu, season a tawp meuh chuan City-in nomawi an chawi lo a, Guardiola a hlawhchham. Spanish manager hian an chak lohna a hrechiang a, tlarhnung a ṭhuah fai bakah nipui transfer-a a sum hmanna tam zawk chu tlarhnung thuam chak nan a hmang.

City hian Guardiola hnuaia season khatnaah goal 39 an chhuah a, match tina goal chhuah ang an ni. Tun season-ah erawh match riat lai khelh ni tawh mah se Pep-a hote hian goal li chiah an la chhuah. Barcelona manager hlui an fakna ber erawh goal khung lamah a ni a, league-ah goal 29 an khung tawh.

Season ṭan hmaa champion tura rinkai City hian league match hnuhnung pangaah goal 24 an khung a, goal nga an khung tlin lohna awmchhun pawh Chelsea niin champion lai lakah hian an tlarhnung phui zia pholangin 1-0 in hnehna an chang.

De Bryune - 100

Belgian midfielder Kevin De Bruyne chuan City tana match 100 a khelhnaah goal khungtu zingah tel lo mah se assist vawi hnih neiin player hmuhnawm bik a ni.

De Bruyne hian league bikah match 69 khelin goal 14 a khung sak tawh a, inelna dang nen chuan Belgian midfielder hian goal 25 khung tawhin assists vawi 38 a nei tawh bawk.

Manchester City manager Pep Guardiola chuan, "Player ṭha ber zinga mi a ni a, a khelh tawh hi chuan hmuhnawm a tam bik a ni," tiin De Bruyne a fak a, goal hnih khungtu Gabriel Jesus pawhin Belgian midfielder a khelhpui thei chu vannei a intih thu a sawi ve bawk.

Hmahruaitu City

City-in point 22 an hmu tawh a, anmahni hnaih bertu Manchester United-in Anfield-ah point hlawhchhuah zawh loh avangin an hmelma lakah point hnihin an fal.

Tottenham Hotspur chu pathumnaah awmin point 17 an hmu. London club hian minute 47-naa Christian Eriksen goal hmangin AFC Bournemouth 1-0 in an hneh a, Spurs-in an mual atana an hawh Wembley Stadium-a league match an chakna hmasa ber a ni.