Nadal hnehin Federer a champion

Tennis player pahnih inelna hmuhnawm chhawp chhuak ṭhintu Roger Federer leh Ra­fael Nadal ten nimin khan Shanghai Masters final an khel a, Grand Slam vawi 19 champion tawh Federer-a'n 6-4, 6-3 a hnehna changin nomawi a chawi.

China-a inkhelah world number 1 Nadal-a'n a service hmasa a, tawnhriat ngah zawk Federer-a'n a chhuhsak nghal. Swiss star Federer hian a service hum chho vekin harsatna nei loin set khatna a la.

Set hnihnaah 2-2 a nih laiin Federer bawkin Nadal service a chhuhsak leh a, game nganaah Nadal-a'n la let ve leh mah se Open Era china mipa singles major title la hnem ber Federer a chetsual ve lo.

Player ropui pahnihte vawi 38 an inkhelhna chiah a ni - record nei ṭha zawk Nadal-a'n vawi 23 hnehna a chang. Tun hnaiah erawh Federer hian Australian Open, Miami Open, BNP Paribas Open leh Shanghai Masters-ah te hnehna a chang vek thung a ni.

Kum 36 mi Federer-a'n a kum a tam tawh avangin inelna zawng zawng hmachhawn thei a nih tawh loh thu a sawi tawh, world number 2 hian US Open hnuah tun ṭum hi tournament pakhat a khelh lehna chiah a ni. Nadal hma­chhawn tur hian semifinal-ah Juan Martin del Potro chu set thum an khelh hnuah a hneh tawh bawk a ni.

Grand Slam vawi 16 champion tawh Nadal-a'n tun hnaiah a khel ṭha tluang a, Shanghai Masters khelh hma hian a zawnin match 15 chhung hnehna a chang thei, nimin khan champion thei ni se la chuan Novak Djokovic nena record inṭawm an neih kal pelin Masters 1000 title vawi 31 a chawi ang. Mahse, tunah erawh record siam tur chuan tournament dang a ngah leh phawt a ngai dawn.