Barca chhandamtu Suarez; Real mawina Ronaldo
Atletico Madrid khelmualah Barcelona an chak dawn loa a lan hnuah Luis Suarez a inlar a, Uruguayan striker hian minute 82-naah goal khungin Catalan club hi point khat a hlawhchhuahpui - Barca leh Atletico-in tun season La Liga-ah tlawm hmel an la hmu lo tluang zel.
Inrinni zan La Liga inkhel dangah minute 80 pelh thlengin Getafe leh Real Madrid 1-1 in an inhnehtawk a, Zinedine Zidane-a naute hian hnehna an chang zo dawn lo niin a lang hman - mah se minute 85-naah Real tan Cristiano Ronaldo a rawn lang a, Portuguese forward hian tun season La Liga-a a goal hmasa ber khungin Real chu 2-1 in hnehna a chanpui.
Lawm hlawh lo
Spain aṭanga Catalan inlak hran thlawptu Barcelona-in Wanda Metropolitano-ah lawm an hlawh lo a, hmun tinah Spain flag hmuh tur a awm. Barca player-te ball an khawih apiangin auh el an ni a, Catalan a thlawpna langsar taka ti langtu Gerard Pique-a'n ball a khawih apiangin an au ring lehzual - Atletico hian Barca fans hnenah ticket an hralh chhuak miah lo bawk a, Catalan club-in tun season La Liga-a a vawi hnih nan fans nei loin an khel.
Minute 21-naah mualneitu team tan Saul Niguez chuan goal hmahruai a khung a, Antoine Griezmann-a'n vawi hnih ngawt chance nei mah se Barca keeper Marc-Andre ter Stegen thiam thil 'show' na mai a ni. Barca tan Lionel Messi leh Luis Suarez ten Jan Oblak enchhinna an nei a, Messi hian post a pet per bawk - minute 82-naa Suarez erawh Slovenian keeper hian a dang thei tawh lo a, Uruguayan striker hian Atletico fans lam hawi chungin a goal khung a lawm zui.
Real an tho?
Getafe khelmualah Real-in goal hmahruai khung turin harsatna an nei lo a, minute 39-na lekah Karim Benzema chuan a hun ṭha neih goal-ah a chantir. Mahse, goal dangin Real a zui lawk lo - Jorge Molina chuan Real goalkeeper Kiko Casilla man phak lohin ball a tlawh lut a, Getafe-in an khelmualah point an beisei hman.
Hliam vanga Gareth Bale inlan theih loh zanah Real-in an si phurh an sut lawk thei lo a, Ronaldo chuan hnai set sawt aṭangin a chance ṭha neih a hlah! Mahse, Portugal captain a vanduai reng bik lo. La Liga match li a khelha a goal hmasa ber chu minute 85-naah a khung a, tun season-a beisei phak lo Real-in inelna hrang hrangah match li chhung chu chak hmel an hmu ve ta. An khelh ṭhat chhawm nun zel an beisei ang.