Liverpool dangtu De Gea

Anfield-ah Jurgen Klopp-a'n chak a tum a, Jose Mourinho-a'n point hlawhchhuah a tum thung. A tawpah Mourinho a hlawhtling zawk a, point insemah Liverpool aiin Manchester United an lawm zawk.

Inrinni zan khan Liverpool-in Premier League-ah Manchester United an mikhual a, goal khung loin an inhnehtawk. United-in Anfield-a an khelh danah chhuan tur an nei a nih chuan an goalkeeper David de Gea chu chhuan tur a ni a, Spanish keeper thiamna vang chauhin Red Devils-in point an hlawh chhuak.

Superman = De Gea?

Kum khat liam taah khan Anfield-ah Reds leh United an lo inhmachhawn tawh a, Mourinho 'defensive' game hlawhtling vangin goal khung loin an lo ṭin tawh. Inrinni zanah pawh thawnthu a danglam tam lo, Anfield-ah point hlawhchhuah tum aiin inhnehtawk tum mai a finthlak tih chu Mourinho ngaihdan a ni a, defensive game bawk a naute a khelh tir.

First half-ah Liverpool-in Joel Matip hmangin hun ṭha an nei a, Cameroon defender hian hnai set sawt aṭanga a pet chu De Gea-a'n a ke veilamin ṭha zetin a lo dang hman - a per leh chu Mohamed Salah-a'n chang fuh mah se Egypt international hian a pet out. Chawlhlawk hman a nih hnuah Liverpool hmuhnawm lehzual mah se Emre Can-a'n an hun neih ṭhat ber goal-ah a chantir thei lo - Reds-in goal-ah shot 19 nei chungin an pet goal lo a, De Gea chet ṭhat leh an finishing tawih lo an tuar.

Lukaku a 'fail'

Manchester United-in tlarhmaah Romelu Lukaku an nei a, Belgian striker hian Premier League-ah goal sarih khungin top scorer a ni mek. Mahse, Everton striker hluiin sawisel a hlawh ṭhinna chu inkhel boruak sangah beisei a phak ngai lo, tih a ni a, chu chu Anfield-ah pawh hmuh turin a awm nawn - Inrinni zana Lukaku-a'n chhuan tur a neih chhun chu target-ah shot pakhat a neih kha a ni a, hei lah hi ram tana a khelhpui Simon Mignolet chuan ṭha zetin a dan sak.

Lukaku-a'n inkhel ṭantir minute 23 chhungin vawi khat chiah ball a tawk fuh a, minute 90 a tawp meuh chuan vawi 22 chiah a khawih fuh. Matip leh Dejan Lovren laka a foul avanga yellow card a chawi lo ve ve chu vannei tak a ni bawk. Lukaku hian Liverpool a ngam lo hrim hrim - Inrinni zana an inhmachhawn hmaa match sarih a lo hmachhawn tawhah match nga ngawt chu 'target' ah shot a nei lo. Belgian striker hi inkhel boruak sang zo lo tia an sawi ṭhin chu a lo dik reng em ni? tih chu United fan-ten Anfield aṭanga zawhna an hawn a ni.

Eng nge an sawi?

Liverpool manager Jurgen Klopp chuan, "Kan khel ṭha a, point thum hlawhchhuah kan phu a ni. Vawi thum vel lai kha chu kan vanduai a, De Gea-a che ṭha a ni. Referee khan penalty min pek awm tak pawh a nei a, Lukaku kha red card chawi tur a ni bawk. Awlsam taka goal khung theihnaah kan khung loh ṭhin avangin inrintawkna hloh miah loh hi kan tih tur a ni a, tun dinhmunah chuan kan la hloh loin ka hria," a ti.

Manchester United manager Jose Mourinho chuan, "Anfield-a point hlawhchhuah hi result chhia a ni lo. First half-ah ball kan chang tam a, goal khung theihna remchang pawh kan nei a ni," a ti a, point hnih hloh ni loin point khat hlawh chhuakah a inngai - United hian 38% possession nei chungin match an khar a, shot an neih zat hi vawi ruk niin goal zawnah vawi khat chiah an pet!

Inkhel Chhehvel
Jose Mourinho-a'n match riatah Jurgen Klopp a hmachhawn tawh a, vawi khat chiah hnehna a chang - vawi li an inhnehtawk a, vawi thum a tlawm.
Nikum nipui laia Mourinho-a'n Manchester United a enkawl hnuah Liverpool nen Premier League-ah point 89 ve ve an hlawh chhuak.
Kum 1921 hnuah a vawi khat nan league match thum chhung chu United leh Liverpool an inhnehtawk.
United-in an match hmasa pariat aṭangin point 20 an nei a, 2011/12 & 1999/00 season-a record an lo neih tawh chu an nih rual.
Klopp-a'n Liverpool a enkawl hnuah 'big six' aṭangin point 37 an hlawh chhuak a, big six inkara point hmu hnem ber an ni.
Liverpool legend Kenny Dalglish chuan he inkhel hi a hmunah a en a, Anfield-a stand pakhat chu player leh manager anga league nomawi pakua chawitu Dalglish hming hian phuah a ni.

Inkhel Results
Liverpool 0 - 0 Manchester United
Burnley 1 - 1 West Ham United
Crystal Palace 2 - 1 Chelsea
Manchester City 7 - 2 Stoke City
Swansea City 2 - 0 Huddersfield Town
Tottenham Hotspur 1 - 0 AFC Bournemouth
Watford 1 - 0 Arsenal
Team Dinhmun
# Team Pld W D L GF GA GD Pts
1 Manchester City 8 7 1 0 29 4 25 22
2 Manchester United 8 6 2 0 21 2 19 20
3 Tottenham Hotspur 8 5 2 1 15 5 10 17
4 Watford 8 4 3 1 13 13 0 15
5 Chelsea 8 4 1 3 13 8 5 13
6 Arsenal 8 4 1 3 12 10 2 13
7 Burnley 8 3 4 1 8 6 2 13
8 Liverpool 8 3 4 1 13 12 1 13
9 Newcastle United 7 3 1 3 7 6 1 10
10 West Brom 7 2 3 2 6 8 -2 9
11 Huddersfield Town 8 2 3 3 5 9 -4 9
12 Southampton 7 2 2 3 5 7 -2 8
13 Swansea City 8 2 2 4 5 8 -3 8
14 West Ham United 8 2 2 4 8 14 -6 8
15 Stoke City 8 2 2 4 9 18 -9 8
16 Brighton & Hove 7 2 1 4 5 9 -4 7
17 Everton 7 2 1 4 4 12 -8 7
18 Leicester City 7 1 2 4 9 12 -3 5
19 AFC Bournemouth 8 1 1 6 4 12 -8 4
20 Crystal Palace 8 1 0 7 2 18 -16 3