Marquez hmaah Dovizioso a thleng
Bike intlansiakna sang leh ngaihhlut MotoGP championship inum boruak a nung chho zel. Nimin khan Japanese Grand Prix tlan niin Ducati rider Andrea Dovizioso chuan kawng huh leh nal hnuaiah Marc Marquez hnehin pakhatna a ni a, an inthlauhna a ti zim hret.
Motegi-a intlansiakah Dovizioso hian a elpui Marquez hi second 0.249 chiahin a hneh a, championship-ah point 11 chiahin an inthlau ta - tun season-ah intlansiak hmabak pathum chiah a awm tawh a ni - tunkar tawp hian Australian Grand Prix an tlan leh ang.
Japanese GP-ah Yamaha team-in beisei an phak lo, hliam damhlim Valentino Rossi a tlan tluan thei lo a, season bul lama rider hmuhnawm ber pakhat Maverick Vinales chu pakuanaah a thleng thung.
Kum 31 mi Dovizioso chuan, "Kawng kawi ṭhenkhatah thutlukna ka siam fuh tawk lo a, chesual zeuh ni ila chuan point hmu miah lo thei dinhmunah ka ding hial. Mahse, kan team lamin tyre hman tur an thlang fuh a, chuvanga hnehna chang thei kan ni," tiin a sawi.
Championship hmahruaitu Marquez chuan, "He hmunah hi chuan Dovizioso hi elpui hautak a ni dawn tih kha chu ka chiang, rin lawk ang ngeiin a che ṭha hle bawk. Intlansiak hmabak pathum a la awm a, ka tan chetsual a thiang lo," tiin a sawi.
Japanese GP Results
# Rider Team
1 Andrea Dovizioso Ducati
2 Marc Marquez
3 Danilo Petrucci Pramac
4 Andrea Iannone Suzuki
5 Alex Rins Suzuki
6 Jorge Lorenzo Ducati
7 Aleix Espargaro Aprilia
8 Johann Zarco Yamaha
9 Maverick Vinales Yamaha
10 Loris Baz Avintia Ducati
Championship Table
# Rider Team Points
1 Marc Marquez Honda 244
2 Andrea Dovizioso Ducati 233
3 Maverick Vinales Yamaha 203
4 Dani Pedrosa Honda 170
5 Valentino Rossi Yamaha 168
6 Johann Zarco Yamaha 125
7 Jorge Lorenzo Ducati 116
8 Danilo Petrucci Ducati 111
9 Cal Crutchlow Honda 92
10 Jonas Folger Yamaha 84