Real Madrid hmaah Tottenham
Real Madrid leh Tottenham Hotspur-in tun season Champions League group match vawi hnih khelh tawhah point ruk an hmu a, goal ruk ve ve khungin, goal khat an chhuah ve ve bawk. Tun season-a an record chiah hi Europe-a club pahnih intluktawkna a ni a, an sulhnu en let chuan Spanish club an chungnung lawr lak.
Zanin dar 12:15 hian Santiago Bernabeu-ah group H hmahruaitu inchuhna neih a ni dawn a, champion lai Real-in English club Spurs an mikhual dawn. Inkhel dangah point la hmu lo pahnih APOEL FC leh Borussia Dortmund an inkhel bawk ang.
Real chungnung
Real Madrid hian Europe-ah Spurs hi vawi li an hmachhawn tawh a, vawi thum chakin vawi khat an inhnehtawk. Hei chauh hi a ni lo, Spurs hian Spanish club lamah hian goal an la khung lo.
Los Blancos hian Champions League group match 29 (W22, D7) ah hneh loh an tawng tawh lo. An chak loh hnuhnun ber chu October 2012-a khualmuala Dortmund an hneh loh ṭum kha a ni daih tawh.
An mual Santiago Bernabeu-ah chuan Real hian group match an khelh hnuhnun 23-ah vawi 21 an chak a, vawi hnih dangah pawh hian khingpuite nen an inhnehtawk tho. Spanish club hian European Cup/Champions League-ah vawi 12 nomawi an chawi a, chung zinga pathum chu season hnuhnung palia an lak a ni.
Hetihlai hian Tottenham erawh group stage an khelh phak vawi thumna chiah a ni a, tun ṭum hi season zawna Champions League an khelh hmasak ber a ni. 2010-11 season-a Spurs-in a vawi khat nana Champions League an khelh ṭum khan quarterfinal an thleng a, Real Madrid-in first leg-ah 4-0 in an hneh. Hemi ṭuma Spurs kawr hatu Luka Modric leh Gareth Bale te chuan Real kawr an ha tawh thung.
Real erawhin first leg leh second leg-a goal khungtu Cristiano Ronaldo an la kawl reng a, Portugal captain hian kartawpa Getafe an hneh ṭumin chakna goal a khung a, tun hma ang thoin an la ṭha reng.
Inkhel tur chu
Tottenham tan Santiago Bernabeu kal hi zamna tham a tling a, amaherawhchu English club tana khelh harsatna hmun zawk erawh tun season-a home match khelh nana an hman Wembley Stadium a ni. Spurs hian kartawp khan AFC Bournemouth an hneh a, hei hi league bika Wembley Stadium-a an chak vawi khatna a ni a, Mauricio Pochettino hoten inrintawkna an neih belh ang.
English midfielder Dele Alli chuan match thum an hremnaa a tawpna ber a hmang dawn a, hrem vanga APOEL hmachhawn thei lo Jan Vertonghen a chhawr theih tawh a, wing back Danny Rose-a'n training a zawm leh tawh bawk. Spurs hian match 9 chhung hneh loh an tawng tawh lo a, striker Harry Kane chuan club leh ram tana match hnuhnung 11-ah goal 15 a khung, English striker hi Real defender tan ven uluk a ṭul ang.
Real lamah Ronaldo chu hming langsar ni mah se tun season bikah Isco a la vul zawk. Getafe an hneh ṭum pawh hian Spanish midfielder hi bench aṭangin minute 71-naah lutin vawi 24 a pass zinga vawi 22 chu a dik a, assist vawi khat a nei bawk. International break hmaa Los Blancos-in Espanyol 2-0 a an hneh ṭuma goal hnih hi Isco khung ve ve a ni.
Zanin hian Isco hian inkhel bul a ṭan a rinawm a, Getafe nena inlan lo Modric pawhin a club hlui hmachhawn turin bul a ṭan ang. Hetihlai hian Gareth Bale erawh a chawn hliam vangin a dinhmun tur a la chiang lo.
Chetsual thiang lo
Borussia Dortmund-in kartawpah RB Leipzig 3-2 in an hneh lo a, Bundesliga hmahruaitu ni chhunzawm thei mah se Champions League-ah erawh point an la hmuh loh avangin APOEL lakah chetsual a thiang lo.
Dortmund leh APOEL hi an vawi khat inkhelhna tur a chauh ni mah se Greece club hian German club vawi kua an mikhual tawhah vawi sarih an hneh lo. An record thlirin Dortmund hi chak zawk tura rin an ni.