Indonesian goalkeeper a thi
Indonesian football chuan Pathianni zan khan hun duhawm lo an tawng, an ram football inelna league sang ber Indonesia Super League club Persela Lamongan tana a hun pum hmangtu goalkeeper Choirul Huda chu a thi.
Kum 38 mi Huda hi a teammate Brazilian midfielder Ramon Rodrigues nen khelmual chhunga an intauh palh vangin a awmah hliam a tuar a, damdawi inah hruai ni mah se a nunna chhan hman a ni lo.
Huda hian kum 1999 khan Persela tan a match hmasa ber khelin a thih ni thlengin club dang a nei lo, match 500 chuang a khelh sak - "The One Man One Club One Love" tia an sawi ṭhin player pakhat hi a club chuan "The Real Legend" tiin amah thlahna thuah an ziak a ni.