Saints chhandam nan Gabbiadini
Pathianni zan Premier League-ah Newcastle United chuan Southampton lakah vawi hnih ngawt hma hruai mah se Saints striker Manolo Gabbiadini an ngam lo a, Italian striker hian goal hnih khungin a team hi point khat a hlawhchhuahpui.
St. Mary's Stadium-a inkhelah Magpies hian minute 20-na lekah goal hmahruai an khung a, yard 25 vela hla aṭangin Newcastle tana a goal hmasa ber hi a khung. Chawlhlawk hman a nih hnuah Gabbiadini a inlar a, September 9 hnua Saints tana a vawi khat nana inkhel bul ṭantu striker hian minute 49-naah si phurh sutna goal a khung.
Mahse, Magpies-in hma hruai nawn turin minute thum bak an nghah a ngai lo. Ayoze Perez chuan Newcastle goal hnihna a khung a, an mualah Saints an tlawm ngei dawn niin a lang hman. Mahse, Newcastle defender Florian Lejeune chu ṭul lo taka Shane Long laka a foul avangin mikhual team-in penalty an chawi a, Gabbiadini chuan goal-ah chantirin goal dang a lut tawh lo.
Southampton manager Mauricio Pellegrino chuan, "Premier League angah chuan eng team pawh hian kan chetsual chhawrin goal khung an thei vek a, kan goal chhuah te kha kan inzirna tur a ni. Fan-ten min thlawp tlat a, a tawpah point kan sual chhuah phah a ni," tiin fan-te a fak.
Newcastle manager Rafael Benitez chuan, "Draw a nih avangin hnual lutuk tur kan ni lo a, chutihrual chuan hnehna chang thei reng dinhmuna ding kan nih avangin lawm lo tur kan ni bawk. Kan thawhrimzia ka ngaihtuahin kha aia ṭha kha chu ka beisei a ni," tiin a sawi.