Everton leh Koeman chhantu Rooney?

Pathianni zan Premier League inkhelah Everton chuan goal khat ve ve khungin Brighton & Hove Albion an inhnehtawkpui a, Merseyside club chhanhimtu chu tudang ni loin Wayne Rooney a ni.

Everton hi tlawm ngat se chuan manager Ronald Koeman dinhmun a derthawng lehzual ngeiin a rinawm - mah se minute 82-naa Anthony Knockaert goal khung chu Toffees (Everton sawina)-in chhanletna an nei hman dawn tawh lo nia ngaih a nih hnuah penalty an hlawh chhuak a, Brighton defender Bruno chuan Dominic Calvert-Lewin a kiua a nghawk avangin penalty a chawi - Wayne Rooney chuan minute 90-naah goal-ah a chantir a, Everton a chhanhim.

Liverpool khaw club hian nipui transfer-ah player lakluh nan pound maktaduai 140 ngawt an seng a, season ṭan dawn kha chuan Champions League hial an sawi ri - mah se beiseina leh a tak ram a inhlat a, Koeman-a naute hian league match riat an khelh tawhah vawi hnih chiah hnehna an la chang.

Everton boss Koeman chuan, "Kha aia ṭha zawk khan kan khel thei tih ka hria, mah se ka naute inpekna leh tumna erawh fak loh theih a ni lo. Point khat chauh kan hlawh chhuak a ni mai thei a, mah se kan result hi kan inkhel hriltu a ni lo," tiin a nauten an khelh ṭhat thu a sawi.