Maribor khelmualah Reds an leng dawn
Zanin dar 12:15 hian Liverpool chuan Champions League group stage match khel turin Maribor an lenchilh dawn a, an match hnuhnung pariata vawi khat chiah chak hmel hmu thei Liverpool hi Slovenia-ah hnehna chang tura beisei an ni.
Liverpool hian group stage-a match hnih an khelh tawhah hnehna an la chang zo lo ve ve a, Sevilla leh Spartak Moscow an inhnehtawkpui - Maribor tal an hneh lo a nih chuan Jurgen Klopp leh a naute lakah Kop ho beisei a bo hle tawh ang.
Mane tel loin
Senegal tana a inlanna lama inhliam Sadio Mane tel loin Liverpool an khelh a la ngai dawn - Reds hian Manchester United lakah Mane an ngai tih hmuh turin a awm a, Senegalese forward anga ball tlanpui thei, tlan chak leh finishing 'tawih' an mamawh tih a lang.
Liverpool Echo chuan Adam Lallana-a'n dam lam a pan tawh niin tarlang mah se English midfielder hi a inlan theih a la beiseiawm loh a, Mane leh Lallana tel loin Reds-in Slovenia an pan dawn tihna a ni.
Attacking football?
Liverpool boss Jurgen Klopp-a'n Manchester United nen goal khung loa an inhnehtawk hnu lawkah Jose Mourinho anga defensive game a khelh ve ngai loh tur thu a sawi a, German coach-in team a lo kaihhruai tawh dan thlirin dawt a sawi lo tih a chiang.
Zaninah pawh Reds hian attacking football an khelh ngei a rinawm a, chutihrual chuan tlarhmaa an chhuanvawr Mohamed Salah, Philippe Coutinho leh Roberto Firmino te chu Klopp hian a chhawr kher ang em? tih chu zawhna awm a ni.
Zawhna chhanna
Reds hian Maribor an hmachhawn zawhah Pathianni khian Tottenham Hotspur an lenchilh lehnghal dawn a, Spurs nena an inkhel tur thlir ran chungin Klopp-a'n Salah, Coutinho leh Firmino te chawlh a pe a nih pawhin a mak lo ang - player pathum hi international break-ah ram tan an feh chhuak vek a, United an hmachhawn lehnghal avangin an chau ang tih a chiang.
Player pathumin inkhel bul an ṭan lo a nih chuan Daniel Sturridge, Dominic Solanke leh Alex Oxlade-Chamberlain ten inkhel bul an ṭan ngei tura ngaih a ni a, Reds-in goal an khung lawk lo a nih erawh chuan inkhel chawhnu lamah Salah leh Coutinho kan hmuh a rinawm thung.