Vanglaini Thlirletna ; Leitlangpuia MPL Round 8 kha...

Inkhel pali a awm a, a hmuhnawm vek. October 12 & 13 khan Lunglei mipuiin Mizoram Premier League-a 'fixture 'fuh' an chang vek emaw tih mai tur a ni - a result hi club lam thlir dan leh mipui thlir dan a dang mai thei a, MPL awm tawha a tawp lam inûm hmuhnawm ber season-ah Lunglei result hian a chhuah dawn niin a lang.

Chhinga Veng FC chu an fâl law law tawh a, semifinal lut ngei tura ngaih an ni. A bak team pasarih hian thih thaa an beih a ngai dawn a, semi final lut vek thei an nih rual chiahin division hniama tla thei vek an la ni - hei hi MPL6 tingaihnawma tihmuhnawmtu tur chu a ni.

Chhinga Veng an kal zel

Lungleia inkhel hmasa berah 'top of the table clash' kan hmu nghal a, Chanmari FC leh Chhinga Veng an inkhel.

Chanmari FC lamin first half-ah clear chance an neih pathum kha thun ngat se Chhingcows tan thawh leh harsa a ni tawh ngei ang; nimahsela an thun miau si lo a, Chhinga Vengin Khawpuimawia an luhtir aṭang chiahin inkhel a danglam - Kelkang tlangval thawh rah sengin MS Dawngliana'n goal hnih a thun a, Chanmari tan semi final lut turin beih fe a ngaih phah dawn - Lalsangzuala Hmar hote erawh pawh din theih an nih hmel tawh lo.

Chanmari FC hi kum dang aiin an naupang a, a tawp inum boruak sanga an talbuai lohna turin fans an mamawh dawn a; Chhinga Veng hian round 14 zawhah 'knockout stage' a inṭan dawn chauh tih an hriat reng a ṭul thung ang.

Ramhlun North an tho e

Season bul an ṭan ṭhat hnua talbuai Ramhlun North tan Lungleia inkhel kha 'thih leh dam inkar' tak tak a ni. Chak ta lo ngat se tho leh tur an awm tawh lo mai thei a; nimahsela an defender thar Liberian player Korhena A. Boekai zarah Bethlehem Vengthlang goal thun tur an dang tluan thei - an 'in form striker' Lalremruata'n goal ṭha zet mai a tauh lut a, team pahnih danglamna chu he goal mai hi a ni - an intluk tawk ngei mai.

BVT hi star nei lem lo, 'team' anga ṭha em em mai an ni thung a, he inkhelah erawh Ramhlun North lamin chak duhna rilru an pu lian zawk - MoM-a thlan tak Lalrinfela'n chance ṭha bik vawi thum a siamsak a, an thun lo vek thung!

Ramhlun North fans an phûr dawn a, semi final an beisei phak avangin Lammuala inkhel leh turah pawh team tan an thawk chhuak tam sawt ang. BVT hian fans an nei chhe ngai lo a, kum 72 mi T. Pachhunga hoin Lungleiah inkhel en turin an kal ngat a ni!

Dinthar an chak ve leh ta

Dinthar FC hian team ṭha zawk an hneh theih riau laiin Chanmari West FC hi an hneh thei reng reng lo a, Aizawla an hneh theih loh team chu Lungleiah an hneh ta - hun tawp dawna Nigerian forward Jackson Victor goal an chakpui. Inkhel inhnehtawk takah Chanmari West FC lamin striker hriam ṭha an neih loh an tuar a, goal thun theihna remchang pawh an hmu ngei a, Dinthar FC keeper Malsawmdawngzela an su tlang zo lo a, he keeper hi man of the match-ah thlan a ni nghe nghe.

Dinthar hian coach thar Vanlalrova an nei a, inkhelh hma aṭangin a ṭang em em a, inkhelh laiin a ṭang zual a, inkhelh bana an chak an lawm dan en khan 'beisei nei team' an ni thar tih a nemnghet.

Dinthar FC hian semi final luh chuan 'eng pawh a thleng thei' tih hriaiin beiseina an nei thar dawn a, Chanmari West hian goal thun 'theih' a pawimawhzia an hre nawn leh ngei ang.

Police phûr, AFC inthlak

'Tla tur chiang' aṭanga beisei nei tura game hnih an chak zawn hnuah Lalbiaksanga Colney hnuaiah Mizoram Police-in Lunglei an pan a, I League champion nen an inkhel. Police hi phûr thar hle mah se an khingpuite hian an foreigner thar pahnih Romanian midfielder Andrei Ionescu leh Afghan defender Masih Saighani an hruai tel miau avangin an ṭha dawn tih a chiang. Ṭhuamluaia Mual khat tlata mipui pungkhawm hmaah Aizawl FC-in si hnihin hma an hruai a, Police-in an sût zo vek.

Police player-te'n an class dik tak an pholang leh ṭan a, 'class' sawi erawh chuan AFC midfielder thar Dutch club PSV aṭanga inzir chhuak Andrei Ionescu class sanzia a goal thun leh a ball khawihah a lang - Europa League pawh lo khel tawh a ni bawk a, Lammualah en tham a tling ang.

Police tan semi final beiseina a thar chho zel a, Aizawl FC pawhin palina nih reng chu a him lo thei tih an hmu chiang sawt ang - team ṭha pahnihin Lunglei mipuite inkhel hmuhnawm an hmuhtir e.

Round 8 - Lunglei
October 12, Ningani
Ramhlun North 1 - 0 Bethlehem VT
RNFC : Lalremruata 25'
MoM : Lalrinfela, RNFC
Chanmari FC 1 - 2 Chhinga Veng FC
CFC : Joe Zoherliana 12'
CVFC : MS Dawngliana 64', 76'
MoM : MS Dawngliana, CVFC
October 13, Zirtawpni
Chanmari West 0 - 1 Dinthar FC
DFC : Jackson Victor 87'
MoM : Malsawmdawngzela, DFC
Mizoram Police FC 2 - 2 Aizawl FC
MPFC : Lalbiakhlua 78'; F.Zosangliana 89'
AFC : William Lalnunfela 41'; Andrei Ionescu 55'
MoM : F.Lalrinpuia, MPFC
Round 9 - Lammual
October 19, Ningani
3:00 PM Aizawl FC Vs Chanmari FC
7:30 PM Chhinga Veng Vs Chanmari West
October 20, Zirtawpni
3:00 PM Dinthar FC Vs Ramhlun North
7:30 PM Bethlehem VT Vs Mizoram Police
Team Dinhmun
# Team Pld W D L GF GA GD Pts
1 Chhinga Veng 8 6 2 0 20 8 12 20
2 Chanmari FC 8 3 3 2 10 6 4 12
3 Bethlehem VT 8 3 3 2 9 8 1 12
4 Aizawl FC 8 2 4 2 15 10 5 10
5 Mizoram Police 8 2 2 4 14 24 -10 8
6 Ramhlun North 8 2 2 4 12 15 -3 8
7 Dinthar FC 8 2 2 4 9 14 -5 8
8 Chanmari West 8 2 2 4 7 11 -4 8
Note : Point inangah goal difference aiah point hmuh
zat inang te inkhelh kual tawhna chu en hmasak a ni.