Goal khung thiam City mikhual tur Napoli

European club zinga goal khung thei pahnih ni mek Manchester City leh Napoli te chu zanin dar 12:15 hian Champions League group match khel turin Etihad Stadium-ah an intawng dawn.

Pep Guardiola kaihhruai City hi Premier League hma­hruaitu an ni a, league match an khelh apiangin goal thum aia tlem lo khung ziah anga chawlhrual theih an ni. Match riatah goal 29 an khung tawh a, kum 1894-95 season-a Everton record siam hnuah hetiang zat goal khung leh thei hmasa ber an ni.

City tlarhma an hriam a, an mikhual tur Napoli pawh sawi nep theih an ni ngawt bik lo. Italian Serie A hmahruaitu hian hnehna an la chang fai vek a, match sarihah goal 25 khungin Serie A record thar an siam ve bawk - zanin hian goal a lut hnem a nih pawhin a mak lo ang.

A fuh ta

City manager Guardiola-a'n season hmasa khan tlar­hnungah buaina a nei a, chinfel tumin tha pawh a thawh nasa hle. Spanish manager hi Bar­celona a enkawl lai aṭang tawha midfielder hmangṭang­kai ṭhin kha a ni, tun season-ah pawh he a kalphung hi a chhawm nung chho mek.

Defender Kyle Walker leh Benjamin Mendy te inhliam chung pawhin buaina an nei hran lo tura ngaih a ni. Tottenham wing back hlui Walker hian Stoke lakah hliam tenau a tawk a, khawvel defender manto ber Mendy pawh an la chhawr thei lo ang.

Guardiola-a'n season hmasa khan 4-3-3 hmangin a naute a rem a, a hlawhtling tawk lo. Tun season-ah erawh 3-5-2 formation hmangin tlarhmaah Sergio Aguero leh Gabriel Jesus te a dah ṭhin. Car accident avanga hliam tuar Aguero a dam tawh a, Argentine striker hi Jesus nena inkawp turin a inpeih leh tawh.

Man City hian tlarhmaah inelna hrang hranga goal sarih khung tawh Sergio Aguero, Gabriel Jesus leh Raheem Sterling bakah goal ruk nei tawh Leroy Sane an nei a, a hmatawngte an vul theih nan hian Kevin De Bruyne leh David Silva te chu khelmual mawitu an ni.

Belgium international Ke­vin De Bruyne hian Stoke City an hneh ṭumin a ṭhiante goal khung tur vawi hnih a siamsak a, tawnhriat ngah Silva-a'n goal a khung bawk - zaninah pawh anni pahnih hi City thahrui pawimawh an ni leh ang.

Pep a phur

Barcelona leh Bayern Munich manager hlui Pep Guar­diola-a'n a club enkawl hmasak pahniha a naute a khelhtir dan angin City team a din chhoah a ngaih theih, Spanish ma­na­ger hian attacking game khel ve tho nena an inhmachhawn tur chu a nuam dawn hlea a hriat thu a sawi.

Kum 46 mi Guardiola chuan, "Kan khingpuite kan nawr theih hian kan tlarhnung kan veng nghal a ni a, kan tlarhnung a phui a nih chuan goal nawr turin kan dinhmun a ṭha tihna a ni bawk. Goal khung duh leh thiam team nena kan inhmachhawn tur hi ka phur tawh hle," tiin a sawi.

Man City hian an match hmasa lamah Feyenoord leh Shakhtar Donetsk te an hneh tawh a, point ruk hmuin group hmahruaitu an ni - zanina an khingpui tur Napoli hian point thum an nei thung.

Goal khung thiam Napoli

Maurizio Sarri kaihhruai Napoli hi European club zinga hmuhnawm berte zinga mi an ni mek a, striker Gonzalo Higuain-a'n Juventus a pan san hnuah tlahniam tur anga ngaih ni mah se hma lam an pan mek zawk a ni. Serie A-ah goal 26 khung tawhin anni aia record nei ṭha an awm lo - champion lai Juve chungah an leng mek.

Argentine striker Higuain thlak nana an lakluh Arka­diusz Milik hi player ṭha tak ni mah se hliam a nei ngun a, season hmasa khan an chhawr tam lo, tun ṭumah pawh hliam vangin Milik leh Manolo Gabbiadini te an chhawr thei dawn lo a, season kal laia goal sarih khung tawh Dries Mertens mawhphurhna a sang zual ang.