Milan derby ngamtu Icardi
Inter Milan captain Mauro Icardi-a'n AC Milan lakah hun tawp hamrik rik hma chiaha hattrick siamin Milan derby-ah a club 3-2 in hnehna a chanpui. Luciano Spalletti enkawl Inter hian tun season Serie A match riatah hneh loh an la tawng lo.
Inter an chungnung
Pathianni zan khan Milan club pahnihte an khelmual inṭawm San Siro Stadium-ah an intawng a, tun ṭuma mual neitu zawk Inter tan Argentine striker Icardi-a'n minute 28-naah Milan defender pahnih kara put chhuakin goal hmahruai a khung, chawlhawk hnuah Liverpool player hlui Suso chuan yard 25-a hla
aṭangin an siphurh a sut.
Inter captain Icardi-a'n midfielder Ivan Perisic-a cross ball chu boruaka zuang kang chungin a hlap lut a, keeper Samir Handanovic-a'n anmahni laman ti lut palhin 2-2 ni mah se dan theih loh Icardi bawkin penalty hmangin chakna goal a khung zui leh - Icardi hian tun season Serie A bikah goal kua a khung tawh.
Inter Milan manager Luciano Spalletti chuan, "Hnehna kan chan hian phurna nasa tak min siamsak ngei ang, inkhel kha ngun taka kan en a nih chuan ka naute inpekna leh theihna san zia kan hmu thei ang. Kum naupangte a nih lai aṭangin Mauro Icardi kutah mawhphurhna hlan a ni a, tunah chuan a mawhphurhna hlen turin a puitling tawh," tiin a sawi.
Milan an buai
Chinese sumdawng hausa kuta an luh pumhlum hnua an season khatnaah Milan-in an ropui tawh ṭhinna ang neih leh an tum a, nipui bazarah pound maktaduai 200 bawr an seng - player 10 chuang an lak zingah defender Leonardo Bonucci (£35.1m) leh striker Andre Silva (£33.6m) te chu club lian dang pawhin an awh rawn an ni phak.
Amaherawhchu, Vincenzo Montella kaihhruaina hnuaiah Milan hi vawi li an chak lo ta a, point 12 hmuin hmahruaitu Napoli point hmuh zatve chiah a ni, table-ah 10-na dinhmun an luah - an tum leh beisei ang chuan season an hmang dawn lo a ang ta hle.
Milan hian tun hnai season nga chhungin manager paruk an nei tawh, tuna manager
ṭanglai Montella hian nikum June thla aṭang khan a hna a thawk ṭan. Italian manager hian season hmasa khan a tum ang ngeiin Europa League a hruai thleng a, kuminah erawh hma an sawn lo a nih chuan a dinhmun a him kher lo ang.
AC Milan manager Vincenzo Montella chuan, "Table kan en chuan kan duh loh ang hlirin thil a kal niin a lang. Amaherawhchu season khat hi a rei hle a, insiamṭhatna hun kan la neihah ka ngai," a ti. Montella hian champion a sawi ri lo a, palina chinah erawh an awm ngei a beisei thu a sawi.