FIFA U17 World Cup Zaninah team ṭha an inlan dawn
FIFA U17 World Cup last 16 match hmasa ber chu nizan khan khelh a ni a, he thu buatsaih lai hian result kan hre hman lo. Vawiin tlai dar 5:00-ah last 16 zan hnihna hman ṭan a ni dawn a, team langsar rual an inlan dawn avangin inkhel hmuhnawm a beisei ngam.
Vawiin inkhel tur zingah tlai dar 5:00-a France leh Spain inhmachhawn tur hi mipui hmuh châk zingah a tel a, a hmuhnawm dawn tih hrilh nawn kan ngai lo. Zan dar 8:00 inkhela team hmuhnawm England leh Japan inkhel tur hi hmaih phal chi a ni lo bawk.
Iran ral lian
Tun tournament-ah rin loh taka team hmuhnawm tia sawi ngam chu Iran an ni - Group C-a match thum an khelhah hnehna an chang vek a, Germany meuh pawh 4-0 in an sawp. Match thum an khelh aṭangin goal 10 an khung a, goal khat chiah an chhuah!
Mexico erawh match thum an khelhah point hnih chiah hlawh chhuak chunga last 16 lut an ni a, Iraq leh Chile inhnehtawk puia England ngam lotu team hi thil mak a thleng a nih loh chuan Iran laka chak tura beisei ngam chi an ni lo.
France nge Spain?
France leh Spain-in last 16-a hmachhawn tur duh thlang thei ngat se chuan an inthlang lo ve ve ang. France hian Group E-ah hnehna chang vek chungin last 16 an lut a, goal 14 ngawt an khung! France hnehna channa kawngah Amine Gouiri a thawhhlawk a, Lyon forward hian match thum aṭangin goal nga a khung tawh a, Spain tlarhnung tan ven uluk a ṭul ang.
Spain-in Group D-ah Brazil an awmpui a, an group-a team ṭha awmchhuna ngaih hi 2-1 in an ngam lo. Niger leh North Korea hneh chhunzawm mah se fiahna hautak an la paltlang loa ngaih a ni a, France lakah hian an tlawm a nih ngat chuan mualpho takin an haw ang - goal hnih khung tawhtu Barcelona forward Abel Ruiz chet ṭhat a ngai dawn tihna a ni.
Team intiat tawk
Zanina inhmachhawn tur zingah zan dar 8:00-a Mali leh Iraq inkhel tur hi team intiat tawk bera ngaih an ni a, inkhel a hmuhnawm ang. Mali hian group B-a match thum an khelhah vawi hnih hnehna an chang a, 3-2 in Paraguay ngam lo mah se Turkey (3-0) leh New Zealand (3-1) sawp thei an nih avangin dah hniam an harsa. Mali tan match thuma goal khung kim vektu Lassana Ndiayé chu innghahna tur a ni leh dawn.
U17 World Cup khelh a nih ṭan hma hauhin Mohammed Dawood-a hmingin lam rik a hlawh a, Iraqi forward hian beisei ang ngeiin Iraq tan a thawhhlawk. AFC U16 2016 top scorer leh best player hian Chile lakah goal hnih khungin Mexico lakah goal khat a khung bawk a, Mali laka hnehna chanpui turin Iraq mipuiten an beisei ang.
England hmaah Japan
Zanin dar 8:00-a inkhel tur England leh Japan-ah chak tur zawk rinthiam a harsa. England hian Iraq, Mexico leh Chile hneh vek chungin last 16 an lut a, an player pawimawh chu Jadon Sancho a ni. Mahse, Borussia Dortmund forward hi German club hian group stage bak a khelh an phal lo nia sawi a awm a, hetichung hian nimin thleng kha chuan team training-naah a tel - Dortmund-a jersey no. 7 ha pha forward tel leh tel loh hian England game-a hril thui dawn.
Japan-in an match hmasa berah Honduras chu 6-1 in an sawp thei a, mah se France an ngam loh hnuah rin loh takin New Caledonia chu 1-1 in an inhnehtawkpui! Japan hriatthiam an harsa a, chak lo tura dah ngawt chi lah an ni lo - chak an tum a nih chuan Honduras laka hattrick siamtu Keito Nakamura chet ṭhat a ṭul ang.
Zanin Inkhel Tur
Iran 5:00 PM Mexico
France 5:00 PM Spain
Mali 8:00 PM Iraq
England 8:00 PM Japan