Mizoram tana gold medal latu Lalhumhimi

Lalhumhimi chuan National Games 2022-ah Mizoram tan gold medal a la. Zemabawk North nula hian Inrinni tlai khan Judo (-52kg) huangah gold medal a la a ni.

Mizo nula hian gold medal la turin harsatna a tawk lem lo. Sailor Dikshi Hemalhai (Gujarat), Nidhi Yadav (Madhya Pradesh), Sirman (Haryana) leh Pincky Balhara (Delhi) te a hmachhawn a, a khingpuite lakah hian full point a hmu vek, a lakah a khingpuiten point an hmu ve miah lo.

Judo-ah hian round khat an in bei a, a rei zawng hi minute nga a ni. Final-ah Humhimi hian Pincky Balhara a hneh, Delhi aiawhtu hi senior national games hnuhnung bera a ngam loh kha a ni, tunah erawh point hloh miah loin a hneh.

Humhimi hian tun hmain, judo senior national-ah gold medal leh bronze medal pathum a la tawh. Tun inelna a hmachhawn hma hian All India Police Meet-ah pawh pathumna dinhmun a lo luah tawh bawk. National Games bik erawh a khelh vawi khatna niin, a hlawhtling nghal.

Lawmthu
Mizoram judo coach F. Vanlalruala chuan, "National Games bikah chuan judo-in gold medal kan lak hmasak ber a ni a, kan lawm khawp mai. Medal hi Mizoram tan a ni," tiin Vanglaini a hrilh a, hlawhtlinna chang tura a naute thawhrimna a fak bawk.

Inrinni khan Lalhumhimi bakah hian ZD Lalnuntluangi (-57) pawh a inlan a, ani hian a match hmasa berah Jammu & Kashmir mi a hneh, match hnihnaah Haryana nen inkhelin, a dar (shoulder) a hliam, inkhel tluan thei mah se a vanduai zawkah a ṭang.

Vawiin hian Lalnilawmawmi (-48kg) a inlan leh dawn, ani hi senior national-ah pawh silver medal lo la tawhtu kha a ni a, coach Maruala leh manager C. Vanlalruati te chuan an nau hian medal a lak theih an beisei thu Vanglaini an hrilh.

Cheng nuai ruk
Infiammite tan Mizoram Incentive Cash Award Scheme siam a ni a, dan siam ang chuan Lalhumhimi hian Mizoram sorkar aṭangin Rs 6,00,000 a dawng ang. Pawisa dawn tur hi inelna neihhma a ruahman fel sa a ni.

Mizoram sports minister Robert Romawia Royte chuan, "National Games khel phak nih ringawt pawh a harsa, chumi kara Lalhumhimi'n gold medal a la thei hi Mizo hnam tan a lawmawm takzet a ni," a ti a, sorkarin Rs 6,00,000 a pek tur thu a sawi tel bawk.

National Games neih laiah hian Mizoramin medal pahnih a la fel tawh. Humhimi hma hian weightlifter Zakhuma chuan bronze medal a lo la tawh bawk a, ani hian incentive cash award scheme angin Rs 2,00,000 a dawng thung ang.