Boxing-ah Mizoramin medal la dawn

National Games 2022 boxing inelnaah Lallawmawma (feather weight) chuan nimin khan quarterfinal-ah Himachal Pradesh boxer Ashish Kumar chu split decision (3-2) in a hneh a, semifinal lutin a chhe berah bronze medal a la chiang tawh.

Tuipui tlangval Lawmawma hian semifinal-ah Services boxer Mohemmed Hussam Uddin chu October 11, Thawhlehni tlai dar 3:45-ah a hmachhawn leh ang. Inrinni khan Lunglei Electric tlangval Malsawmtluanga chuan middleweight-ah Gujarat boxer Sahil Aslambhai Nilgar chu 5-0 in a hneh a, vawiin tlai dar 3:45 hian quarter final-ah Uttarkhand Pankaj Kumar a hmachhawn leh ang.

Hmeichhe inelnaah Muthi nula Rebecca Lalinmawii chuan flyweight quarterfinal-ah Haryana boxer Minakshi chu unanimous decision (5-0) in an hneh lo a, light weight quarterfinal-ah Kros Hmangaihsangi chuan Punjab boxer Simranjit Kaur chu unanimous decision (5-0) thoin a hneh lo.

Mizoram aṭangin boxer panga an tel a, hmeichhe boxer pahnih telin medal beiseina a awm tawh lo. Mipa boxer pathum aṭangin Lawmawma leh Mala ten beiseina la nei zel a, C. Lalduhawma (Light heavyweight) erawh first round-ah a tla tawh thung.

Mizoram boxing team hi coach Lalfakzuala (SYS) leh B. Lalhriatpuii ten an hruai a ni.