Potter-a Chelsea an vul ṭan

Graham Potter-a'n amah ringhleltute result hmangin a chhang zel a, Inrinni zaa khan Premier League inkhelah Chelsea chu 3-0 in hnehna a chanpui - coach Bruno Lage an ban hnua a thlaktu tur la nei lo Wolverhampton Wanderers an hneh.

Chelsea tan Kai Havertz, Christian Pulisic leh Armando Broja te chuan goal khat ṭheuh an khung a, Wolves-in a chhanletna tur an neih loh avangin London club-in chiang takin hnehna an chang.

Blues hian inkhel an thunun viau chungin goal erawh an khung lawk bik lo a, first half hun pek belhah Kai Havertz hmangin goal hmahruai an khung - Mason Mount-a siamsak a ni.

Goal dang lut loin chawlhlawk hman a ni a, second half-ah Mount bawk kan hmu nawn - English midfielder hi Christian Pulisic nen an in one-two hnuah, Pulisic-a'n a hmawr bawkin an goal hnihna a khung.

Hun tawp nan minute khat chauh a awm tawh - mahse, Armando Broja chuan Chelsea tana a goal hmasa ber a khung leh hram a, season hmasaa Southampton lama loan-a khel forward hian theihna a nei sang tih a pholang nawn.

Potter-a kaihhruaina hnuaia an match hmasa berah Chelsea hian RB Salzburg (1-1) chu inhnehtawkpui mah se, Crystal Palace (2-1), AC Milan (3-0) leh Wolves (3-0) an hneh tawh a, an match hnuhnung pahnihah goal an khung theih piahlamah a venhim an thiam tih an pholang tel.

Chelsea hi an vanneih zan ni ngat se, hei aia tam zawk goal khung thei an ni - August hnua a vawi khat nana Premier League match kheltu Cesar Azpilicueta chuan cross hlauhawm tak tak a nei fo a, Ruben Loftus-Cheek leh Pulisic ten chance duhawm an hlah bawk.

London club tana lawmna belhchhahtu chu an squad chhahzia a lang kha a ni. Coach Potter-a'n huaisen taka thutlukna siamin, Palace laka 2-1 a chak team aṭangin player pasarih ngawt a thlak danglam!

Tun hnaia form em em mai Reece James leh Pierre-Emerick Aubameyang te pawh bench-ah dah an ni a, Raheem Sterling pawh bench-ah a ṭhu tluan - heti chung hian Chelsea an khel ṭha a, he team hi hmachhawn an châkawm lo chho ṭan leh ta.

Wolves tan Diego Costa chuan bul ṭan mah se a la inkhel tam tawk lo tih a lang a, lakchhuah a nihin Chelsea fan-ten an striker hlui hi ding chungin zahna an lantir.