Formula 1 champion Verstappen

Max Verstappen chu a kum zawnin Formula 1 champion a ni. Red Bull driver hian nimin chawhnu lama tlan Japanese Grand Prix-ah hnehna a chang a, a phu ang ngeiin car intlansiakna sang berah hian a vawi hnih nan a champion.

Tun season intlansiak vawi 18 awm tawh zinga 12 zetah hnehna a chang a, point 366 hmuin amah hnaih bertu - amah ang bawka Red Bull car khalhtu Sergio Perez (253) tan umphak theih a ni tawh lo, intlansiak hmabak erawh pali lai an la nei.

Champion chu
Ruah a sur nasa a, chhum a zin bawk avangin Suzuka tlankawngah chhiatna nasa thleng thei a ni. Intlansiak tir lamah chetsualna a thleng a, inelna tih tawp lailawk a ngai a, tlankawnga vawi 53 an tlan kual tur pawh vawi 29-ah tih tawi a ni nghal.

Intlansiak an thar thawh leh hnuah Verstappen a tlan fal takzet a, amah tibuai phak an awm lo. Champion turin hnehna chan bakah fastest lap nei chunga point khat hmuh belh a mamawh a, point khat hi a hmuh belh thei bik lo thung.

Max-a hnungah Charles Leclerc a thleng a, intlansiak an zawh fel hlimah Dutch tlangval hi a champion tih puan a ni nghal lo. Mahse, lap hnuhnung berah Leclerc hian dan a bawhchhia a, hei vang hian hremna pek niin pahnihna ni mah se pathumnaah pawh thlak a ni.

Lap hnuhnung bera Red Bull team hnathawh khan sawi zui a hlawh ang. Perez khan Leclerc kha tlan pel ni se Max a champion dawn, na takin a um a, kawngkawi hnuhnung ber thlengin a nawr na takzet, Ferrari driver hian a intlan pelh tir duh lo thung.

Perez hian a tum angin tlan pel ta chiah lo mah se, a nawr nat em avangin Leclerc hian kawng kawiah a tlan ngil phah a, hei vang hian a thlen hun aṭangin second nga paihsak a ni a, pahnihna dinhmun hi a humhim tlang thei ta lo a ni.

A mak!
Japanese Grand Prix lawmman an sem a, hetih lai hian world champion pawh an la puang chuang lo. A hnuah Verstappen hi a champion tih hrilh a ni, ani chuan, "In ti tak tak em ni?" tiin a lo zawt let hial, a beisei leh duh tak ni mah se a rin loh hnuah a champion leh hnuhnawh.

Season hmasa kha chuan intlansiak tawp berah champion a chiang chiah. Intlansiak tawp ber a ni satliah lo, lap hnuhnung berah Verstappen hian Lewis Hamilton tlan pelin a champion a nih kha, kuminah erawh amah elphak reng an awm lo.

Vawi 12 a chak tawh lai hian Ferrari driver Leclerc chuan vawi thum chauh hnehna a chang. Driver dang Perez chu vawi hnih a chak bakah, Carlos Sainz chuan ṭum khat hnehna a chang bawk, midang tan hmun a awm ve lo.

Hamilton-a'n chak ni hmel a la hmu lo tluang zel. Mercedes driver hian F1 a luhchilh hnuah, season khatah vawi khat tal hnehna a chang ziah. Tun season-ah erawh a chak ngei dawn em, tih sawi ngam a harsa ta.

United States Grand Prix, Mexican Grand Prix, Brazilian Grand Pirx leh Abu Dhabi Grand Pirx te a la awm dawn. World champion vawi sarih ni tawh hian vawi khat tal chak a tum ang, kawng awlsam erawh a ni dawn lo.