Mizoram swimmer tan bung thar

National Games-ah a vawi khat nan Mizoram aiawhin swimmer panga - mipa pahnih leh hmeichhia pathum te an inlan a, state dang la pha lo deuh mah se Aquatics Association of Mizoram (AAM) tan bung thar a ni.

Mizoram coach Albert Malsawmkima chuan, "National Games a kal tur hian practice hun hi kar hnih vel chauh kan nei hman a, chuti chung chuan kan chang ṭha em em a ni. Stroke technique leh pool etiquettes pawh veteran swimmers ang chiah an ni a, speed leh timing erawh hmasawnna tur kan ngah thung. Practice-na hun leh hmun ṭha zawk nei phei ilang chuan Mizote hi final-ah kan la lut ve ngei kan beisei," tiin a sawi.

Mizoram team hi coach Albert leh manager Christina Lalmuanpuii ten an hruai a, swimmer zingah final thleng an awm lo. Swimming hi Sardar Patel Swimming Complex, Rajkot-ah October 2 aṭang khan neih ṭan a ni a, October 7, Zirtawpni khan inelna hi neih zawh a ni.