Haaland hoin City-in hma an hruai

Manchester City-in Inrinni zan khan Southampton 4-0 in an sawp a, Pep Guardiola hote hi Premier League hmahruaitu an ni. Nizan khan Arsenal leh Liverpool an inkhel a, Gunners hian hnehna an chang a nih chuan pakhatna dinhmun an luah lehnghal ang.

Etihad Stadium-ah City-in Saints hneh turin harsatna an tawk lo a, first half-ah Joao Cancelo leh Phil Foden ten goal an khung a, second half-ah Riyad Mahrez leh Erling Haaland ten an khung belh.

Norwegian striker Haaland hian inelna hrang hrangah goal 20 a khung tling der a, goal 20 khung hi chu season khata striker ṭha pangngai khung zat ni mah se City striker chuan match 13 chiah a mamawh.

Haaland awm hnuah Kevin de Bruyne pawhin hma a sawn a, Foden goal khung tur siam sakin tun season-ah assist vawi kua a nei tawh. A khelh ṭhat zel chuan Thierry Henry record, season khata vawi 20 assist khum thei dinhmunah a ding.

Pep Guardiola chuan, "Haaland awm hi De Bruyne tan pawh a ṭha a ni. Saints lakah pawh chance vawi li vel a siam a, chutihrualin tun aia khel ṭha turin theihna a nei a ni," tiin a sawi