Terina a inpeih tawh

ATK Mohun Bagan midfielder Lalrinliana Hnamte chuan ISL hmachhawn tura a inpeih tawh thu a sawi a, Kolkata club hian zanin dar 7:30-ah Chennaiyin nen an league match hmasa ber chu an khel dawn.

Dungtlang khaw chhuak, Chanmari chher hriam Terina hian season hmasa khan East Bengal tan ISL-a a season hmasa ber a khel a, Indian top flight league-a a season hmasa berah Kolkata club tan player langsar a ni phak.

Nipui transfer inhawn rualin, ISL club hausa Bagan an che vat a, Terina hian season hnih chhung khel tura contract ziakin a zawm - a club tharah beiseina sang tak a nei.

Terina chuan, "East Bengal ai khan nuam ka ti zawk mah a, keimah lamah chuan harsatna a awm rih lo. Coach Juan Ferrando kaihhruaina hnuaia khelh nuam ka ti a, kan ruahman anga kan khelh theih phawt chuan champion theih kan inbeisei," tiin Vanglaini a hrilh.

Bagan hian nipui transfer-a player langsar zingah Australian centre back Brendan Hamill, Australia international hlui Dimitri Petratos leh Paul Pogba unaupa Florentin Pogba lalutin, thawm an nei na hle.

Germany international hlui Thomas Brdaric kaihhruaina hnuaia khel tur Chennaiyin hian nipuiah player 22 zet an lalut thar a, Mainz 05 striker hlui Petar Sliškovic, Rennes centre back hlui Fallou Diagne leh Ghanaian striker Kwame Karikari te chu player langsar an ni - Mizo player an nei lo thung.

Nizan Inkhel (Result kan hre hman lo)
Hyderabad FC 7:30 PM Mumbai City FC

Zanin Inkhel Tur
ATK Mohun Bagan 7:30 PM Chennaiyin