ISL an ṭan - referee-in result a hliah khuh!

India rama football league sang ber Indian Super League chu Zirtawpni zan khan khelh ṭan a ni ta a, inkhel hmuhnawm tak en tur awm nghal mah se, referee thutlukna makin result leh inkhel ngaihnawmna a hliahkhuh.

Inrinni zan khan Bengaluru chuan an mikhual NorthEast United chu 1-0 in an hneh a, Bangalore club tan Brazilian defender Alan Costa chuan minute 87-naah inkhela goal awmchhun a khung.

Bengaluru-in goal an khung hnu lawkah Highlander rilru natna belhchhahin a awm - Jon Gaztanaga chuan NorthEast club tan si phurh a sutah a inngai a, mahse, assistant referee-in offside tiin a ban a phar a, pawm a ni lo.

Replay en erawh chuan goal khung hi pawm ngei tur niin a lang a, Highlander coach Marcos Balbul chu referee thutluknaa lungawi loh vanga a chet dan avangin hnawhchhuah a ni bawk - NorthEast United tan a na.

Highlander tan hian season hmasaa hliam vanga inlan thei lo Emanuel Lalchhanchhuaha-a'n inkhel bul a ṭan a, Mizo player dang inlan an awm lo thung.

Zirtawpni zan khan ISL match hmasa ber chu Kerala Blasters leh East Bengal ten an khel a, Jawaharlal Nehru Stadium, Kochi-a inkhel entu mipui 34,978 hmaah mualneitu Kerala an chak.

Blasters tan hian Adrian Luna chuan goal hmahruai khungin, Ivan Kaliuzhnyi chuan goal hnih a khung bawk a, Kolkata club tana Alex Lima goal khungin awmzia a nei phak lo.

Melbourne City player hlui Luna hian a goal khung hi a fanu Julieta tan a hlan zui - Julieta hi kumin April khan a thi a, Luna hian a bana a fanu lem a chhut kai chu kawkin, van lam a kawk zui a, mittui nen goal khung a lawm.

Luna goal khung a mawi tluk zetin assist tu Harmanjot Khabra-a'n hla tak aṭanga ball a vawrh luh chu lam hmaih a thiang lo a, Ukrainian Premier League club Oleksandriya aṭanga loan-a Blasters zawmtu Kaliuzhnyi-a'n ISL-a match hmasa bera goal hnih a khung pawh hriatreng a ni tawh ang.

Blasters tan hian K. Lalṭhathanga (Puitea) chuan inkhel bul a ṭan a, Bethlehem Vengthlang tlangval a khel ṭha hle - East Bengal tan Lalchungnunga'n bul a ṭan a, Jerry Lalrinzuala chu bench aṭangin a lut bawk.

October 7, Zirtawpni Zan
Kerala Blasters 3 - 1 East Bengal FC
KER: Adrian Luna 72'; Ivan Kaliuzhnyi 82', 89'
ESB: Alex Lima 88'

October 8, Inrinni Zan
Bengaluru FC 1 - 0 NorthEast United
BEN: Alan Costa 87'