Sergio Ramos an hnawt chhuak

Paris St-Germain a zawm hnuah Sergio Ramos chu a vawi khat nan hnawhchhuah a ni. Spanish defender hian yellow card a hmu hmasa, mahse referee a hnial buai vanga card hmu nawnin an hnawt chhuak.

Defender rorum Ramos hian PSG a zawm hnuah hliam vangin match a khel tam tawk lo, tun hnaiah erawh rinrawl a ni. Reims nen 0-0 a an inhnehtawk ṭuma red card a hmuh hi, football a khelh hun chhunga vawi 28 an hnawhchhuah tlinna a ni nghal chiah.

Inrinni zan Ligue 1 inkhelah Lionel Messi chu hliam vangin a inlan thei lo. Champions League khel zo an ni a, kar laklawhah UCL khelh tur an nei leh bawk - match an ngah avangin Neymar pawh a tir lamah chuan bench lamah hahchawlhtir a ni.

Kylian Mbappe hoa khel PSG goal nawr a na tawk lo a, bench aṭanga Neymar a luh hnuah an hlauhawm sawt. Brazil international hian chakna goal khung theihna remchang nei mah se goal zawnah a pet lo hlauh.

Hun tawp dawnah Neymar leh Mbappe ten hun ṭha an bawhpelh ve ve bawk a, goal khung harsat PSG an che fuh thei lo a, forward pahnih hian yellow card an hmu ve ve, an ṭum fuh loh zan a ni.

Christophe Galtier-a naute hian tun season atan bik point an hloh vawi hnihna a ni a, table hmahruaitu chu la ni tho mah se pahnihna Marseille nen an inkarah point thum chauh a awm, an dinhmun a la nghet bik lo hle.