Juve aia huai zawk Milan

Serie A champion AC Milan chuan Champions League lama an mualphona an hliahkhuh lehnghal. Inrinni zan Serie A inkhelah Milan hian an mikhual Juventus chu 2-0 in an hneh.

San Siro-a inkhelah Milan tan defender Fikayo Tomori leh winger Brahim Diaz ten goal khat ve ve an khung a, mikhual Old Lady lamin a chhan letna tur an nei lo - Massimiliano Allegri naute an che fuh hlei thei lo.

Chelsea laka an mualpho avangin Milan hian chak an mamawh, an duh leh mamawh ang ngeiin point thum an hmu. Stefano Pioli naute hian match kua aṭangin point 20 an nei a, hmahruaitu Napoli leh pahnihna Atalanta te nen an point a inzat.

Juve erawh UCL-a hnehna chang hlim ni mah se an ze ṭha lo a kalsan hleithei lo. Striker ṭha Dusan Vlahovic-a'n goal a khung lo a, a ball hloh vangin an lamah goal a lut bawk - Serbia international tan zan ṭha lo a ni.

Allgeri naute hian tun season bikah khualmuala Serie A an khelhin chak ni hmel an la hmu miah lo, point 13 chauh la neiin table-ah pariatna an ni. Champion sawi ngam a ni rih lo a, a sang zual pali zinga tel phak pawh a harsa dawn.

Inrinni zan inkhel dangah Inter Milan chuan Sassuolo 2-1 in an hneh. Inter pawh hi season bul an ṭan fuh tawk lo, chutih rualin tun hnaiah an insiamṭha leh tawh. Palina Udinese an phak lohna point li a ni a, match khatin an khel hnem thung.