Madrid khaw club an chak

Inrinni zan La Liga inkhelah Real Madrid leh Atletico Madrid an inlan a, Madrid khaw club pahnih hian an khingpui ve ve hnehin point thum an hlawh chhuak.

Real Madrid hian an mikhualna ramah Getafe chu 1-0 in an hneh a, Eder Militao chuan inkhela goal awmchhun hi a khung - Real inlan hma hian Atletico chuan 2-1 in mikhual Girona an hneh ve bawk.

Atletico tan Angel Correa chuan goal hnih a khung a, Girona tana Rodrigo Riquelme goal khungin awmzia a nei phak lo - Madrid khaw club an chak ve ve a, an dinhmun erawh a la inthlau hret.

Real-in hnehna an chan avangin table-ah hmahruaitu an ni a, Atletico chu palinaah an chho bawk - nizana inlan Barcelona result a zirin Real dinhmun a danglam leh thei a, Atletico pawh nizan lama inkhel Real Betis result-ah an la innghat. He thu buatsaih a nih lai hian result kan hre hman lo.

An chak hram
La Liga an match hnuhnung bera chak zo lo Real Madrid-in hnehna an chang ve leh ta a, mahse, goal khat bak an khung thei lo - Real hian minute thumna lekah Militao hmangin an khung a, eng zat tak khung ang maw, tih chu mipui rilrua zawhna awm a ni.

Mahse, Spanish champion vanneih zan a ni lo - Rodrygo goal khung chu video assistant referee hmanga ennawn a nih hnuah offside vangin pawm a ni lo a, Vinicius Junior pawh penalty pek ni zet mah se referee-in thutlukna a sut.

Brazilian forward hi Luis Milla chuan penalty box-ah a titlu a, mahse, hemi hma hian Vini hian touchline pawnah ball a tawh avangin penalty pek a ni leh lo - he inkhelah hian Karim Benzema chu squad-ah pawh a awm lo a, inhliam vang ni loin chawlh hahdamtir a ni.

Getafe -in Real lakah si phurh sutna remchang an nei a, mahse, Fabrizio Angileri-a shot chu striker Borja Mayoral chuan goal ruakah a lo tlawh hman lo a, Carles Aleñá shot chu Real keeper Andriy Lunin chuan ṭha zetin a dang a, Domingos Duarte pawhin a chance neih a chhawr lo.

Khua a var?
Champions League-a chak lo hlim Atletico Madrid-in Club Brugge laka 2-0 a an mualphona nghilh zai an rel a, Inrinni zan khan an mikhual Girona chu 2-1 in an hneh - league match hnih a zawnin an an chak ta.

Atletico tan Correa chuan goal hmahruai a khung a, Antoine Griezmann siamsak a ni - Barca boss Xavi chuan Griezmann transfer chungchangah Atletico nen an inrem tawh thu a sawi a, bench aṭanga luhtir ṭhin Griezmann-a'n Girona lakah bul a ṭan.

Goal dang lut loin chawlhlawk hman a ni a, second half minute thumnaah Correa bawk a inlar - tun season-a a vawi hnih nana league-a bul ṭan ve chiah forward hian Girona keeper Juan Carlos chetsual zar zoin an goal hnihna a khung.

Girona tan Rodrigo Riquelme chuan minute 66-naah si phurh sutna goal a khung a, goal dang an khung zui loh avangin awmzia erawh a nei phak lo - kum 22 mi winger hi Atletico player a ni a, Girona-ah hian loan-a khel mekin a club tak tak lamah zawk goal a khung a ni.

October 7, Zirtawpni Zan
Osasuna 1 - 2 Valencia
OSA: Darko Brašanac 90+3'
VAL: Justin Kluivert 28'; Mouctar Diakhaby 54'

October 8, Inrinni Zan
Almeria 3 - 1 Rayo Vallecano
ALM: Lucas Robertone 8'; Srdan Babic 17'; El Bilal Touré 39'
RAY: Alejandro Catena 81'
Atletico Madrid 2 - 1 Girona
ATM: Angel Correa 5', 48'
GIR: Rodrigo Riquelme 66'
Sevilla 1 - 1 Athletic Bilbao
SEV: Óliver Torres 4'
ATB: Mikel Vesga 73'
Getafe 0 - 1 Real Madrid
REM: Éder Militão 3'