Brighton leh Spurs danglamna Kane

Amex Stadium-ah Inrinni zan khan Brighton & Hove Albion-in Tottenham Hotspur an mikhual a, Harry Kane-a goal hmangin Antonio Conte hoten 1-0 in hnehna an chang.

Minute 22-naah Son Heung-min-a shot-cross chu Kane hian tauh pialin goal awmchhun a khung. Spurs-in hnehna an chan avangin match kua aṭangin point 20 an hmu a, Arsenal hneh lo mah se Man City an phak lohna chu point thum chauh a ni. Conte hote hi champion thei zingah an la tel a, Champions League khel leh turin beiseina sang tak an nei ang.

Brighton erawh coach thar Roberto de Zerbi hnuaiah chak hmel la hmu lo mah se game mawi an khel a, result ṭha zawk an hmuh thuai a rinawm. De Zerbi hote hi Liverpool nen 3-3 in an inhnehtawk a, Spurs lakah chance ṭhahnem tak an insiam chungin 1-0 in an chak lo. Inkhelh banah Seagulls boss De Zerbi hian an khelh ṭhat zawk thu a sawi a, inkhel thlirtute chuan a thusawi hi an ṭawmpui ang.