Italy hmachhawn tur Sweden

Europe aṭanga FIFA World Cup khel tur zawnna playoff-a inhmachhawn tur chu nimin khan Zurich-ah pawh a ni. Vawi li champion tawh Italy chuan hming langsar ber zinga mi Sweden an hmachhawn dawn.

Russia-a World Cup khelh a nih hunah Italy emaw vawi li semifinal lut tawh Sweden kan hmu dawn lo. Playoff inkhel tur dangah Nothern Ireland leh Switzerland, Denmark leh Republic of Ireland bakah Croatia leh Greece te an inhmachhawn bawk ang.

Playoff first leg hi No­vem­ber 9-11 ah khelh a ni ang a, second leg hi November 12-14 ah khelh lehnghal tur a ni. November thla chanve a nih meuh chuan Europe aṭanga khel tur a chiang dawn. Tunah hian Europe aṭanga khel tur team 10 a chiang tawh a, Russia chu a thlengtu an nih avangin an tling a, qualifier paltlangin France, Portugal, Germany, Serbia, Poland, England, Spain, Belgium leh Iceland te an inpet tling bawk.

Playoff khelte hi Europe-ah 2018 World Cup khelh tumin ram 54 chu group pakuaah ṭhendarh an ni a, group hmahruaitu ṭheuh an tling nghal. Pahnihna zinga tiṭha pariat chu playoff khel turin an tling thung.

Chung team pariatte chu Sweden, Switzerland, Northern Ireland, Republic of Ireland, Denmark, Italy, Greece leh Croatia te an ni a. Pahnihna zingah Slovakia chu vanduaiin playoff an khel pha lo a, Russia ram an pan ve thei dawn lo.

Tie Draw chu
FIFA World Cup khel tur zawnna a nih angin FIFA ran­king chu seeded siam nan hman a ni a, playoff-ah October thlaa FIFA ranking chu team siam rem nan hman a ni.

Pot 1-ah Switzerland (11), Italy (15), Croatia (18) leh Denmark (19) te an awm a, heng team te hi an inhma­chhawn thei lo. An hmachhawn theih chu pot 2-a awm Northern Ireland (23), Sweden (25), Republic of Ireland (26) leh Greece (47) te an ni.

An pawt ta
Republic of Ireland ma­na­­ger Michael O'Neill chuan tie draw neih hmain, "Italy hmachhawn chu ka duh lo. Croatia hi friendly match-ah kan intum tawh a, team ṭha tak an ni. Duh thlang thei chu ni ila thlan tur pali aṭang chuan Switzerland emaw Denmark ka thlang ang," tiin a sawi.

Michael O'Neill duh ang ngeiin Republic of Ireland hi Denmark nen pawh fuh an ni. Playoff khel tur zinga FIFA ranking-a sang ber Switzerland chu Northern Ireland nen pawh fuh an ni thung.

Player nei ṭha Croatia-in Euro 2004 champion Greece an hmachhawn dawn. Croatia coach Zlatko Dalic chuan, "Kan khingpui turte hi an ṭha a, hna harsa tak tur a ni. Amaherawhchu player ṭha ka nei a, ka hna hmabak hi kan zawh ngei ka ring," tiin a sawi.

Sweden-in duh thlang ta se Italy an thlang kher lo ang. Sweden coach Janne Andersson chuan, "Match hnih hmabak hautak tak kan nei a, ram dang pawhin hun harsa tak an tawng ve tho ang. Kan khingpui tur kan hre ta hi a lawmawm a, tunah chuan kan in­puahchah thei ta," tiin Italy chu a hlau lo a, an hmachhawn a ṭul thu a sawi.

Playoff Fixtures
Sweden Vs Italy
Nothern Ireland Vs Switzerland
Denmark Vs Republic of Ireland
Croatia Vs Greece