Benfica-in min thlak danglam - Matic
Manchester United midfielder Nemanja Matic chuan zanin dar 12:15-a an hmachhawn tur Benfica chu amah thlak danglamtu a nih thu a sawi chhuak.
Serbia international Matic chuan, "Benfica ka zawm tirh khan kha tih hunlaia coach Jorge Jesus khan number 6 emaw defensive midfielder anga ka khelh tur thu min hrilh. Ka position khelh ṭhan lohna a nih avangin a tirah chuan mak ka ti a, coach-in dawhtheihna nen min zirtir a, thawhrimna nen muang changa hmasawnin Manchester United tan hial ka khelh theih phah a ni," tiin Portuguese club aṭanga a inzir hnem thu a sawi.
Matic hian Jose Mourinho hnuaiah United-ah hmun pawimawh a chang nghal a, midfield khaikhawmtu a ni. Serbian midfielder hian Chelsea tana ṭum hnih a khelh inkarah Benfica tan ṭum hnih tho a khel a, Matic hian Portuguese club-ah hian manager Jorge Jesus hnuaiah a position chu playmaker aṭangin defensive midfielder-ah a thlak a ni.
Benfica hi Matic a club hlui chauh a ni lo a, Jose Mourinho leh Victor Lindelof ten sulhnu an hnutchhiah tawh. Season ṭantirh khan Lindelof hian Portuguese club aṭangin United hi a zawm a, Mourinho erawhin 2000-01 season khan Jupp Heynckes thlakin manager hna a chelh a, amaherawhchu club president Manuel Vilarinho-a'n contract a pawhsei sak duh loh avangin December thlaah a bang thung.
United hian Champions League match hmasa pahnihah Basel leh CSKA Moscow te an hneh tawh a, an khingpui tur Benfica hi point la hmu lo mah se an khelhna tur hmun Estadio da Luz-ah chuan hneh an awlsam lo ang. Jose Mourinho-a'n hliam vangin Paul Pogba leh Zlatan Ibrahimovic te an la inlan thei lo a, Argentine defender Marcos Rojo chu la dam chiang lo mah se Portugal-a zin zingah a tel.
Red Devils-in Anfield-a point khat an hlawhchhuah ṭumin Eric Bailly, Marouane Fellaini leh Michael Carrick te an tel lo a, an hmalam hun hriat a la ni lo. Liverpool lakah Mourinho hoten goal venhim hna an thawk a, Champions League-ah erawh khualmuala khel tur ni mah se an khelh dan an thlak ang. Benfica hian right-back Andrea Almeida chu Basel an hneh loh ṭuma hnawhchhuah a nih avangin an chhawr thei dawn lo.
Portuguese club Benfica hian league match riat an khelh tawhah vawi khat chiah an la chak lo a, Liga Nos-ah pathumna an ni mek. Champions League-ah erawh result ṭha an nei lo - an mualah CSKA 2-1 a an hneh loh hnuin Basel lakah 5-0 in an tlawm. Knockout stage thlen an tum a nih chuan United an hneh a ṭul a, point an hmu lo a nih phei chuan pathumna niha Europa League khelh bak beisei ngam chi a ni tawh lo. United tana ven ṭul tur erawh kum 33 mi Jonas a ni a, Brazilian striker hian tun season-ah goal 10 a khung tawh.
Zanin Champions League Group A inkhel dangah CSKA Moscow leh Basel te an inkhel bawk ang. United leh Benfica inkhel hi Sony Six-ah live in an pe chhuak ang.