Blues tan thawh a hun ta
Premier League champion Chelsea-in an match hnuhnung berah league match-a chak hmel la hmu lo Crystal Palace chu 2-1 in an ngam lo a, Blues fan-te an nguai.
Champions League group match khel turin zanin dar 12:15-ah Chelsea-in AS Roma an mikhual dawn a, fan-te lunghnur lutuk kaihthawh nan tun hi Chelsea tan hun ṭha chu a ni - London club hian match hnih an khelh tawhah hnehna an la chang ve ve a, Champions League lamah an tlangnel rih hle.
Morata a dam?
Chelsea striker Alvaro Morata chuan hliam vanga a chawlh reng hnuah training a zawm leh der tawh a, Spanish striker hian inkhel bul a ṭan kher ang em tih erawh a la hriat loh. Blues damdawi In a lun rih a, midfielder N'Golo Kante leh Danny Drinkwater te chu tun dinhmuna inlan thei lo tur chiang sa an ni.
Palace laka an tlawm ṭumin Victor Moses-a'n hliam a tuar a, kar li tal a chawlh a rinawm bawk. Nipui transfer laia Roma aṭanga Chelsea zawmtu Antonio Rudiger-a'n a club hlui a hmachhawn a rinawm a, England lama a pem fuh zia lantir a duh ang.
London-ah Ninja
Antonio Conte-a'n Juventus leh Chelsea-ah Roma midfielder Radja Nainggolan lakluh a tum ve ve a, a hlawhchham ve ve bawk. 'The Ninja' tia hminglem an pek midfielder hi zaninah a inlan dawn a, Conte-a'n a hriatchian midfielder hi dan dan a ngaihtuah a ṭul ang. Roma-a amah enkawl
ṭhintu Luciano Spalletti chuan, "Nainggolan ang player 10 i neih chuan team ṭha tak i din thei ang, khawiah pawh khel se a khel ṭha em em vek zel a ni," tiin a fak.
Chelsea tana ven uluk ṭul tur chu Edin Dzeko a ni bawk. Manchester City striker hlui hian Premier League-ah hun a lo hman tawh avangin English club-te a hrechiang a, Stamford Bridge-ah a inthlahrung lo ang - goal 29 khunga season hmasa Serie A top scorer hian match kua a khelhah goal riat a khung leh der tawh a, Blues tlarhnung tan ngaihthah a thiang lo.