Pawisa nei tan Magpies a lei theih e!

Newcastle United neitu Mike Ashley chuan Premier League club hi lei duhtu an awm chuan a lei theih thu a puang a, December hma ngeia a club hi hralh a duh - pawisa nei tan ngaihven theih a ni!

Ashley hian Magpies-ah kum 10 neitu nihna a chelh chhungin Championship-ah vawi hnih ngawt an tla hman a, season hman zawh takah Championship nomawi chawiin Premier League an inpetkai. Tun season-ah league match riat khel tawhin pakuana dinhmun an luah mek.

Magpies chuan, "Newcastle United chuan hmalam hun eng tak neih a duh a, he club-in a beisei ṭhin hlawhtlinna leh hmasawnna duhawm tak a neih theih nan chuan neitu dang hnena hlanchhawn mai hi he club neitu ni lai mek chuan ṭha a ti a ni," tiin thuchhuah an siam.

Kum 53 mi Ashley hian kum 2007 khan Newcastle United hi a lei a, fan-te nen an inkar boruak a ṭha ngai lo. Tun dinhmunah pawh manager Rafael Benitez nen an inhmu thiam lo mek nia sawi a ni a, Spanish manager chan hlau Magpies fan-te chuan Ashley duh lohna hi an lantir leh nasa tawh hle.