FC Pune City-ah Chanmari player

Thawhṭanni zan khan ISL club FC Pune City-in Chanmari FC 5-0 in an hneh. Balewadi Stadium, Pune-ah MPL champion lai hi chak zo lo mah se ISL club hian inkhelh banah Joe Zoherliana leh Jakob Vanlalhlimpuia te chu an club tana khel turin inremna an ziahpui nghal - player pahnih hi a leiin an lei ang.

Indian Super League atana inpuahchah mek Pune City-in friendly match an la thutak a, coach thar Ranko Popovic-a'n an ṭhat dan bera inkhel bul ṭantirin foreigner pali a chhawr nghal.

Foreigner nei ve lo leh rawlthar rual Chanmari lakah first half-ah inkhel thununin goal thum an khung bakah second half-ah team thar luhtirin goal hnih dang an khung leh bawk.

Chanmari FC-in player 14 chiah an hruai a, foreigner an neih loh bakah captain Rochhingpuia leh keeper Lalmuanawma te an zin ve loh avangin ISL club an elpha lo.

Pune City asst. coach Pradhyum Reddy chuan, "Kan squad a lian a, foreigner pariat nei kan ni. Chanmari zin chau kan hmachhawn a, an kim lo bawk nen an ṭhat tur ang an ni pha lo," tiin Mizo club dinhmun a hriatthiam thu Vanglaini a hrilh.

Chanmari hi an tum pakhat erawh a hlawhtling, MPL club player pahnih Lengpui defender Joe leh Hnahthial forward Jakob te chuan nakkum January 1, 2018 aṭangin ISL club hi an zawm ang.

Shillong Lajong coach hlui Pradhyum chuan "Joe leh Jakob te hi kan enthlakna a rei tawh a, hmabak duhawm tak an neiin kan hria; reserve team-ah an awm phawt ang a, an hmasawn dan azirin senior team-ah pawh an khel thei ang. FC Pune City tan an khel thei tur hi ka lawm takzet a ni" tiin an duh ang player an lak theih avanga a lawm thu a sawi.

FC Pune City vice president Tejas Goradia chuan "Chanmari FC te an hun chep tak karah an lo zin thei hi ropui kan ti a; an hlawkpui ngei kan beisei a ni. Joe leh Jakob chauh hi kan la dawn lo a, Chanmari FC players dangte pawh kan thlir reng dawn a, MPL-ah pawh champion leh ngei turin duhsakna ka hlan a ni," tiin Mizo player an en thlak chhunzawm tur thu a sawi.

Chanmari FC managing board chairman John Lalpeka chuan "Kan zin chu kawng engkimah kan hlawhtling a, min thlengtu FC Pune City te an felin an changtlung a, an chungah lawmthu kan sawi a ni. Player-te tan inphochhuahna ṭha tak a ni a, chak lo mah ila; thil tamtak kan zir chhhuak a ni. Players dang pawh hetianga an khelh theih nan theihtawp kan chhuah dawn a ni. FC Pune nena kan inremna anga transfer fee club-in kan tel tur hi ropui kan ti a, Mizoram football-in bung thar kan kai a ni. Kan inkhel Pune Mizo ṭhahnem takin min ṭawiawm a, an chungah lawmthu kan sawi takzet e, Mizo club hmangaihtu FC Pune City lo ṭan chhunzawm zel turin ka sawm nghal a ni," tiin an hlawhtlin thu a sawi.