Foxes tana point hlawh chhuaktu Mahrez

Thawhṭanni zan Pre­mier League inkhelah Leicester City tan hun tawp dawnah Riyad Mah­rez chuan an si phurh sutna goal khungin an mikhual West Brom nen 1-1 in an inhnehtawk a, an mualah Foxes-in point khat an hlawh chhuak hram.

King Power Stadium-a inkhelah West Brom forward Nacer Chadli-a'n minute 63-naah free kick aṭangin goal a khung a, an khingpui goal zawna an pet awmchhun hi an chak pui ngei dawn niin a lang hman.

Amaherawhchu, nipui transfer laia club chhuah­san a duh thu sawi tawhtu Mahrez chuan a hun ṭha tak tak a khawhral hnu­ah minute 80-naah an si phurh a sut hram, Algeria international tan tun season-a a goal thum­na chiah niin May thla hnua a league goal neih leh hmasak ber a ni.

Foxes hian August 19 hnu lamah league match ruk an khelh aṭangin point thum chiah an la hmuh belh a, tun dinhmunah point ruk hmuin table-ah 18-na an ni mek, an dinhmun a duhawm lo hle.

Leicester City boss Craig Shakespeare chuan, "Inkhel thunun tak chung sia goal kan khung theih mai loh hi chuan a boruak hi a rit ṭhin, hun tawp dawnah kan phu ang ngeiin goal kan sual chhuak a, point hmuh hi kan phu a ni," tiin a sawi.

Foxes hi an goal nawr a na tawk lo a, ball inpe kual hnem viau mah se West Brom tlarhnung tan hna hautak an siamsak hnem tawk lo - forward thar Kelechi Iheanacho chuan khelmual chhung­ah minute 74 hun a hman chhungin Baggies lam box chhunga ball a khawih eih lo a ni.

West Brom manager Tony Pulis chuan, "Hun tawp dawna goal kan chhuah avang khan kan lawmna a kim lo hle, chutih rualin Premier League hi chu a harsa a, eng inkhel mai pawh hi a harsa vek ṭhin a ni," tiin a sawi.