Heynckes-a'n sulhnu hlui chhui dawn

Bayern Munich-in Jupp Heynckes hoin zanin dar 12:15 hian Celtic an mikhual dawn. UEFA Champions League hi German club hian an la thu tak a, Italian manager Carlo Ancelotti-a'n a hna chan chhan nia lang pawh Paris Saint-Germain laka 3-0 a an tlawm vangah a ngaih theih.

Group B inkhel dangah hmahruaitu PSG-in point la hmu lo RSC Anderlecht hmachhawn turin Belgium an tlawh ang. Khawvel player manto ber Neymar leh rawlthar duhawm Kylian Mbappe te inkhel hi Sony Ten 3-ah a en theih ang.

Hawi san tum Bayern!

Germany-in FIFA World Cup 2014 an champion a, Euro 2016 champion chhunzawm thei lo mah se FIFA ranking-a world number 1 an ni a, ram dang hnuaia kun hreh hnam an ni. Hei chiah hi German club ṭha ber Bayern Munich rilru put hmang a ni a. PSG-in eng ang pawhin sum hmang tam se Bavarians tan French club laka mualpho a thiang lo.

Bayern Munich hian Bun­desliga nomawi vawi 27 an chawi tawh a, kum nga chhung a zawna an champion tawh bawk avangin league nomawi hi chu lak ngei ngei tura ngaih a ni. Bavarians-in Champions League an ngai pawimawh a, amaherawhchu Barcelona hlawhtlinpuitu Pep Guardiola meuh pawhin an duh hi a tihhlawhtlinsak thei lo.

German club-in Champions League an chawi hnuhnun ber chu 2012-13 season daih tawh kha niin Jupp Heynckes hnuaiah an champion. Bayern hian Champions League nomawi hi vawi nga an chawi tawh a, kum 1974-76 inkarah vawi thum an champion hnua an champion lehna hmasa ber chu 2001 a ni leh chauh a, hei vang hian German club-in Ancelotti hawisanin nomawi chawipui tawhtu Heynckes chu chawl tawh mah se an thlem chhuak leh a, Europe-a hawisan leh an duh vang a ni.

Heynckes chu

Jupp Heynckes hnuaiah Bayern-in nomawi lian pathum an chawi a, sulhnu ropui tak ni mah se a hun lai kha Ger­man club ṭhat lai bera ngaih a ni. Khatih lai kha Bastian Schweinsteiger leh Philipp Lahm te vanglai a ni a, 2014 FIFA World Cup-a Germany champion team-ah khan Basti leh Lahm bakah hian Toni Kroos, Manuel Neuer, Jerome Boateng leh Thomas Muller te chu final-a starting eleven chang pha an ni.

German manager hian Athle­tic Bilbao aṭangin Javi Martinez a lalut a, Spanish mid­fielder hian hmun pawimawh a chang pha a, Heynckes awm loh hnuah inhliam vangin a buai thung. Robert Lewandowski awm hma niin Croatian forward thlawp turin Franck Ribery leh Thomas Muller te an awm a, Arjen Robben pawhin a lungawina khawp khelhna hun a nei bawk.

Bayern hi treble champion tur khawpin player an nei ṭha a, hei vang hian 'hahdam ka mamawh' tawh titu Heynckes-a'n a thutlukna zuka a rawn let leh takah chuan chona harsa zawk a hmachhawn dawn tihna a ni.

Bundesliga lamah Frei­burg 5-0 a hnehin Bayern Heynckes-a hnuaiah bul an

ṭan a, Celtic lakah pawh point thum lo chuan an lungawi lo ang. Kum 72 mi Heynckes hian tun hmaa a neih loh player ṭha Robert Lewandowski, Arturo Vidal, Mat Hummels leh Joshua Kimmich te an nei a, zanin hian chak ngei tura beisei an ni.

Engtin zel?

Celtic hian kum li chhung Champions League group stage-a chak hmel an hmuh loh hnuah an match hnuhnung berah Anderlecht 3-0 in an hneh a, Allianz Arena-ah point an hlawhchhuah chuan Scottish club tan knockout stage luhna kawng a inhawng zel ang.

Amaehrawhchu, Celtic-in result ṭha nei tur chuan Lewan­dowski an dan theih a ṭul dawn a, season liam ta khan Polish striker hian season liam ta Champions League-ah goal riat a khung. Tun season-ah Lewandowski hian league-ah goal kua a khung leh der tawh a, ven uluk a ṭul ang.

Bayern stiker Lewandowski chuan, "Freiburg nena kan khelh ṭum ang thoa kan khelh leh thei chuan goal kan khung leh ṭeuh thei ang," tiin result ṭha tak a beisei thu a sawi a, Brendan Rodgers tan hriat nuam a ni dawn lo.

Celtic boss Rodgers chuan, "Bayern hi an tla chhe mek tiha sawi a awm a, amaherawhchu chutiang ngawt a ni lo. Player ṭha rual awm khawmna an ni a, team ṭha an ni. Manager thar an nei a, he inelna hi an duh chu a ni," tiin an khingpui turte a fak a, a ṭawng fimkhur hle.

PSG hi

PSG-in ram tana khel pha player an ngah avangin Ligue 1 match hnuhnung berah Edison Cavani, Thiago Silva leh Marco Verratti te an awltir a, relegate thei dinhmuna ding Dijon chu injury time-ah 2-1 in an hneh hram.

Champions League-ah erawh PSG hi an ṭhat dan berin an inrem dawn a, RSC Anderlecht-in an mualah khel dawn mah se point hmuh a harsa ang.