Federer-a'n Nadal a hnaih zel

Tennis player zinga inelna ropui chhawp chhuaktu Roger Federer leh Rafael Nadal te hi kum 10 chuang zet chu court chhungah an inel tawh a, a la tawp mai dawn lo. World number 1 ni chunga season khartu zawk nih tumin an inum mek.

Thawhṭanni khan Association of Tennis Pro­fessionals (ATP) chuan ranking thar a tichhuak a, number 1 ni lai Nadal (10,465 points) chu a chung berah awm chhunzawm mah se Shanghai Masters champion Federer-a'n (8,505 points) a hnaih zel.

Grand Slam vawi 19 champion tawh Federer hian China-a final khelh zawh tak khan Nadal hi 6-4, 6-3 in a hneh a, tennis a khelh hun chhunga a nomawi 94-na niin Ivan Lendl-a title lak zat a tluk chiah a, a khum ngeiin a rinawm.

Hard court season hmang ṭha em em tu Marin Cilic chuan ranking-a a tawn san ber ṭum tawngin palina a ni a, a chungah hliam vanga chawl mek Andy Murray a la awm. Hliam vanga tun season chhunga an hmel kan hmuh tawh loh tur Novak Djokovic leh Stan Wawrinka te chu a sang zual 10 zingah la tel mah se an tlahniam zel thung.

US Open champion hlui, ban rek na vanga inkhel tam thei lo Juan Martin Del Potro chu 19-naah awmin kum thum hnua a vawi khat nan a sang zual 20 zingah a inhlangkai ve leh ta - Argentine player hian hliam nei loa a khel tluang a nih chuan hmalam a pan zel a beisei awm.

Tun season chhungin tournament khelh tur a tam tawh lo, ATP World Tour Masters 1000-ah chuan Paris Masters chiah a awm tawh a, ATP World Tour 500 zingah Vienna Open a la awm bawk. Heng pahnih bakah hian tunkar chhung hian hmun thumah ATP World Tour 250 khelh a ni bawk.

Season khar nan Octo­ber 13 aṭangin ran­king-a a sang zual pariat ten ATP Finals an khel ang. London-a inlan tur hian Nadal, Federer, Alexander Zverev leh Dominic Thiem te chu an tling chiang tawh.