AFC Cup Bengaluru tan beisei a la bo lo

Zanin dar 7:00-ah Bengaluru FC chuan AFC Cup Inter-Zonal final khel turin FC Istiklol an mikhual dawn a, goal hnih aia tam khung chunga hnehna an chang thei a nih chuan a season hnih nan a zawnin final an lut dawn tihna a ni.

Asia khawmualpuia club inelna sang ber dawttu-ah Bengaluru hian season hmasa khan Indian club-ten an la tih theih ngai loh tia final lutin thawnthu thar an lo ziak tawh a, zaninah bung thar kai turin hun ṭha an nei leh ta.

Thlirlet ila...

Inter-Zonal final (semifinal tlukpui) first leg-ah Bengaluru hian khualmualah Istikol hi an lenchilh a, 1-0 in an tlawm haw. Tajikistan champion khelmuala inkhelah Bengaluru an khel chhe hran lo. Ball an chan zat ringawt pawh 63.2% a ni a, an buaina erawh goal hmaa an hriam tawk lo kha a ni - vawi khat chiah shot an nei, hei hi zaninah thlak danglam an tum tur chu a ni.

Bengaluru-in fak an hlawh ṭhinna chu an rilru huaisenna hi a ni. Season hmasa khan semifinal first leg-ah Malaysian club ṭha Johor Darul Ta'zim chu 1-1 in an inhnehtawkpui a, AFC Cup champion lai lakah Bangalore club hi tho tura ngaih an ni lo. Mahse, Bengaluru player-ten an rilru huaisenna an pholang a, second leg-ah hnehna changin inkhel pahnih belhkhawmah 4-2 in an chak - Bengaluru fan-te tana thu hriat nuam tur chu he inkhela an player pawimawh Sunil Chhetri chu Blues tan player pawimawh a la ni reng.

Chutichuan...

First leg-ah Bengaluru coach Albert Roca a fimkhur a, tlarhnungah defender panga a tlar. Zaninah erawh Spanish coach hian attacking football a khelh ngei a ngai tawh dawn a, tlarhmaah Sunil Chhetri, Udanta Singh leh Toni Dovale te an inkawp ngei a rinawm. Si ban nghak turin Gurpreet Singh Sandhu a ding ang a, a hmaah Rahul Bheke leh Juanan an inkawp ang.

Istiklol tan captain Fathollo Fathuloev chu innghahna tur a ni leh dawn a, tlarhmaah forward Maunchehr Dzhalilov chu ven uluk bik ṭul tur a ni. Tajikistan champion hian an match hnuhnung pangaah tlawm hmel an hmu miah lo bawk a, an phur vanglai tak a nih dawn avangin Bengaluru tan mikhual châkawm an ni lo.

Khawiah nge Mizo

Bengaluru-ah Mizo pali an awm a, Lalthuammawia Ralte, Daniel Lalhlimpuia, Mal­sawmzuala leh Zohming­liana Ralte te an ni. Thuama'n Bengaluru tan kum 2014 aṭangin a khel tawh a, Mizo zinga senior ber a ni. Champhai tlangval hi ISL draft-ah Banga­lore club hian an chhang nawn ngat a, a man atan nuai 30 chuang an seng - mah se Gur­preet a awm miau avangin Thuama tan hmun a la awm rih lo.

Daniel leh Sawmtea hi Benga­luru-in ISL draft-ah chhuah loin an chelh chhunzawm a, Albert Roca hnuaiah hmun erawh an la chang tam tawk rih lo hle. Zotea Ralte-in I League-ah Aizawl FC a champion pui avangin ISL draft-ah a langsar a, Bangalore club hian nuai 25-in an chang - Ramhlun South tlangval hian Barcelona assistant coach hnuaia hmun pawimawh chang phak turin hun a la nei tam tawk lo.

Chhetri-a inpeih

Bengaluru captain Sunil Chhetri chuan mahni khelmuala inlan tur an nih avangin an hlauhthawn loh thu a sawi. India captain ni bawk striker chuan, "Kan khelmuala kan khelh chuan tumah kan hlau ngai lo a, eng team pawh hmachhawn ila hlauthawng loin kan khel

ṭhin," a ti a, goal khat an phurh mek chungchangah, "Goal khat chauh a ni a, a tam lo. Si phurh sut tum luatah kan chetsual a hlauhawm a, away goal chhuah thei kan ni lo tih pawh rilruah nghet taka kan vawn a ṭul," tiin a fimkhur hle.

Bangalore club hian hnehna an chang a nih chuan India-in AFC Cup final hi a thleng dawn - Iraqi club ṭha Al-Quwa Al-Jawiya chuan final hi an lut fel der tawh a, season hmasaa Bengaluru hneha nomawi chawitu kha an ni. Chhetri chuan, "Istiklol kan hneh a nih chuan kan khelmualah ngei AFC Cup final kan khel dawn tihna a ni a, chu aia ropui chu enge awm chuang? Final luh ngei ngei kan tum a ni," tiin India rama final khelh ngei an tum.