Season thar beiseitu Sharapova

Maria Sharapova chuan Tianjin Open nomawi a chawi chuan season thar atan beiseina a siamsak thu a sawi a, tun season tawp hma inelna an la neih tur ho chu a ṭha thei ang bera hman a tum thu a sawi.

World number 1 hlui Sharapova chuan, "Midang aiin match ka khel tlem bik a, ka ranking pawh a hniam. Tournament ka khelhin rinkai ka ni phak lo a, tunah chuan player ṭha lakah pawh hnehna ka chang thei tih ka lantir leh tawh," tiin a sawi.

Russian nula hi thla 15 hrem a nih hnuah nomawi a chawi leh thei tawh a, a elpui player dangte tan chuan hmachhawn a chakawm lo leh tawh khawp ang.

Grand Slam vawi nga champion tawh Sharapova chuan, "Ka hun tawn mek hi a nuamin hun rei tak hnuah ka hlim ve hle a ni, season khar hmain a ṭha thei ang bera khelh chhunzawm ka tum a, chu chuan season thar atan inrintawkna min pek belh bawk ang," tiin a sawi. Sharapova hi tunkar chhunga khelh tur Kremlin Cup-ah a inlan ang.