Goal khung thiam Germany leh US an chak

FIFA U17 World Cup last 16 match hmasa ber chu Thawh-

ṭanni zan khan khelh a ni a, match hnih awmin goal kua a lut nghal! Group stage-a Iran laka an mualpho hnuah Germany-in team ṭha zia an pholang a, Colombia chu 4-0 in an sawp.

Paraguay-in point kua hmu chunga last 16 an luh avangin USA lakah pawh chak tur zawka rinkai an ni a, mah se beisei loh angin thil a thleng - United States rawlthar rual hian hmabak êng tak an nei tih pholan nan goal nga ngawt an khung a, Paraguay-in a chhanletna tur goal khat pawh an nei thei lo.

German ral lian

Iran, Guinea leh Costa Rica te awm hona group aṭangin Germany-in pahnihna nichungin last 16 an lut a, beisei an phak lo. Guinea leh Costa Rica hneh mah se Iran laka 4-0 ngawta an tlawm chu an mualpho pui hle. Mahse, Germany-in last 16-ah anmahni beiseitu ten an beisei thlawn lo tih an pholang a, Colombia lakah goal li an khung.

Germany tan rinlawk ang ngeiin captain Jann-Fiete Arp a vul a, goal hnih a khung. Hamburg striker goal khung karah hian Yann Bisseck leh John Yeboah te chuan goal khat ve ve an khung bawk a, Yeboah goal khung hi Jann-Fiete Arp-a siamsak a ni bawk.

US tan Weah

Paraguay-in match thumah hnehna chang vek chungin last 16 an lut a, knockout stage-ah ngam loh an tawng - dawl zawrin an zawr. USA tan Timothy Weah chuan hattrick a siam a, Paraguay tlarhnungin an ngam lo. Weah hian minute 19-na aṭangin goal a khung ṭan a, Andrew Carleton leh Ayo Akinola te thawhrah sengin US tan goal hmahruai a khung.

Goal dang lut loin chawlhlawk hman a ni a, second half-ah USA tak tak an inlar. Paris Saint-Germain forward Weah-a'n second half ṭan aṭanga minute riat hnu lawkah 'goal of the tournament' niawma mawi a khung zui a, Andrew Carleton leh captain Josh Sargent ten goal khat ve ve thawh bawkin minute 77-naah Weah-a'n a hattrick siamna goal a khung zui. Paraguay tan thawh ngaihna a awm tawh lo.

Zaninah last 16

Germany leh USA-in an khingpui ve ve hnehin quar­ter­final an lut fel der tawh a, nizanah inkhel pali awmin result kan hre hman lo a, zaninah last 16 match hnih a la awm dawn. Vawiin tlai dar 5:00 inkhelah Ghana leh Niger an inkhel dawn a, zan dar 8:00-ah Brazil leh Honduras an inhmachhawn bawk ang.

Ghana leh Brazil hi quarter­final inpetkai ngei tura beisei an ni - Ghana hian Group A-ah Colombia leh India hnehin last 16 hi an lut a, Niger hi match thum an khelha vawi khat chaka last 16 lut an ni thung. Brazil-in Spain, Niger leh North Korea hneh vek chungin last 16 an lut a, group E-a France, Japan leh New Caledonia an hmachhawna Caledonia chiah an hneh avanga a thiam 16 zinga tel Honduras lakah an talbuai a rinawm loh.