Arsenal laipui a puak ring tual tual

Boruaka rinthu leng vel ṭhin kha a tak tak a ni tih rin a hun ta e! Arsenal chuan an hma a fiahna hautak inchhawp chu an paltlang zel. Premier League hmahruaitu hian Liverpool 3-2 in an hneh, an match hnuhnungah Tottenham Hotspurs an sawp tawh bawk.

Champion thei tur khawpa team ṭha tamna, a sang zual pali zinga tel phak ringawt pawh a harsa tia an sawina Premier League-ah Mike Arteta naute an kaltluang hle a, match kua aṭangin point 24 an nei, a chung berah an awm vang mai a ni.

Hei erawh hria ila, tunah hian Khuangchawi thla chawhma lam chauh a la ni. Thlasik khaw vawt tak an la hmachhawn dawn a, chumi hnuah ṭhal leh nipui boruakin a la nuai dawn, a chunga awm reng hi thil awlsam a ni dawn lo tih chu anmahni ngei pawhin an hrethiam.

Player rem dan
Mikel Arteta-a'n a duh angin player a rem thei. Season kal laia a neih ṭhat a dah khawm thei a, duhthusam vek erawh a ni lo. Oleksandr Zinchenko chu hliam vangin a khel thei lo, left back Kieran Tierney awm mah se Mohamed Salah veng turin Takehiro Tomiyasu a ring zawk.

Gabriel Jesus thlawp turin Gabriel Martinelli leh Bukayo Saka te an awm a, an hnungah Thomas Partey ten thlawpin captain Martin Odegaard a tlazep. A hnungah Ben White, William Saliba leh Gabriel te chu dan pangngai angin an inkawp.

Sadio Mane chhuah hnuah Jurgen Klopp-a'n first eleven nghet tak a la nei thei lo niin a lang. Salah, Diogo Jota leh Luis Diaz ten bul an ṭan rual vek a, striker man tam Darwin Nunez chu a hmatawngah a awm, chawmtu tur a nei ṭha hle.

Hliam vangin Andrew Robertson a khel thei bik lo, a hmun ruakah Konstantinos Tsimikas a ding. Virgil van Dijk nena inkawp rem ṭhin Joel Matip a awm a, a sirah Trent Alexander Arnold a awm bawk - Gunners laka goal chhuah mai mai ngai lo ho kha an ni.

Laipui a puak
Pathianni zan Emirates Stadium-a inkhelah goal kan hmu hma, second 58-na lekah Arsenal lamin an goal nawr hmasa an tihlawhtling nghal. Captain Odegaard-a ball fing chu Gabriel Martinelli-a'n lain, chiang zetin an goal khatna a khung nghal.

Arsenal phur lutuk tur chu Darwin Nunez-a'n a vaw dai, minute 34-naah Luis Diaz-a cross chu hnai takah a khung, chawlhlawk hma chiahin Saka-a'n Martinelli siamsak a khung zui a, chawlhlawk laiin 2-1 in hma an hruai.

Arsenal hian Premier League bikah, half time laia hma an hruaina inkhel hnuhnung 12-ah hnehna an chang vek. Second half tirah erawh Diaz hliam vanga lut Roberto Firmino-a'n tawih zetin siphurh a sut a, mualneitu fans phur lutuk tur chu a beng dai leh hmak.

Klopp-a'n tlarhnung a rem uluk sawt a, counter attack an hmang. Arsenal lamin khung belh tum mah se chesual thei ve reng an ni bawk, hun tawp dawnah erawh Jesus-a penalty hlawh hmangin Saka-a'n chakna goal a khung.

Reds an lawm lo
Inkhel bul an ṭan fuh lo a, tun season atan chuan hei hi thil thar a ni tawh lo. Mahse, goal an chhuah hnuah an sut thei a. Jota-a cross ball defender Gabriel-a'n chiang takin a kutin a lo dang, penalty pek an ni lo - VAR hmang pawha ennawn a ni lem lo bawk.

Hun tawp dawnah Thiago-a'n box chhungah Jesus a tlawh zeuh a, na tak niin lang lo mah se Brazilian striker a tlu thiam mai si, penalty an chawi. Penalty an hmuh tura ngaih an pe lo a, an chawi loh tura ngaihah an chawi leh thung si.

Reds manager Klopp chuan, "Penalty thlen lai bawrah kha chuan ball kha pet chhuak ni ila a fel mai tur. Chutihrualin penalty hmuh nan chuan a nem hlein ka hria, khatiang hun tak kha referee-ten thil thlen dan an ennawn hun tur niah ka ngai," tiin a sawi.

Liverpool hian an league match hmasa pariatah ṭum hnih chiah hnehna an chang, kum 10 chhunga season bul an ṭan chhiat ber ṭum a ni. Rangers nen Champions League an khel ang a, kar tawpah EPL champion Manchester City an mikhual zui ang.

Champion tum
"Club lian an la tum hlei nem," tiin Arsenal chanchin an sawi ṭhin. Tunah chuan Antonio Conte enkawl Spurs an hneh a, tun hnaia an ngam hleih theih loh Klopp enkawl Liverpool meuh pawh an hneh ta, inrintawkna an nei sang ta hle.

Martinelli a hmuhnawm tluan chhuak zak, goal hmasa leh pahnihnaah amah vengtu Trent Alexander-Arnold a paltlang chiang viau a, goal hlauhawm dang a sual chhuak bawk - a ball pek ṭha tak kha Odegaard-a'n khung ni se a hmingṭha zual ang.

Hale End chhuak a ni - an tih chuan Arsenal ṭantute thinglung a khawih nghal ṭhin. Bukayo Saka a puitling tawh, ball a ken ngam bakah box chhungah a lalut ngam, hun tawp boruak sangah penalty pet turin ball a la nalh ngam a, keeper ṭha Alisson a hmachhawn zuam hle.

A khelh ṭhan lohna hmuna khel Tomiyasu-a'n Salah a dah 'nil' thei a, an boruak ṭhat bakah inrintawkna an nei sang vek, fak tur kan zawng a nih chuan hetianga team boruak ṭha siamtu Arteta a ni a. Granit Xhaka boruak thlaktu pawh Spanish manager bawk hi a ni.